प्रस्तावित ३७ मेगावाटको तेजो थोगाम आयोजनाको डिपिआर तयार गर्न ठेक्का सम्झौता

काठमाडौँ । ३७ मेगावाटको तेजो थोगाम खोला जलविद्युत् आयोजनाको विस्तृत आयोजना प्रतिवेदन (डिपिआर) तथा बोलपत्र सम्बन्धी कागजात तयार पार्न ठेक्का सम्झौता भएको छ । ताप्लेजुङमा प्रस्ताव गरिएको आंशिक जलाशय आयोजना (पिआरओआर) को प्रवर्द्धक कम्पनी स्नोफल हाइड्रोपावर प्रालि र परामर्शदाता श्लेषा इन्जिनियरिङ कन्सल्टेन्सी प्रालिबीच सम्झौता भएको हो ।

सम्झौता पत्रमा स्नोफल हाइड्रोपावरका अध्यक्ष प्रकाश दुलाल र श्लेषा इन्जिनियरिङ कन्सल्टेन्सीका अध्यक्ष शशि शर्मा भण्डारीले हस्ताक्षर गरेका छन् । सम्झौता बमोजिम अब परामर्शदाता कम्पनी श्लेषा इन्जिनियरिङले आयोजनाको विस्तृत सम्भाव्यता अध्ययन, विस्तृत आयोजना प्रतिवेदन र आयोजनाको भौतिक निर्माणका लागि आवश्यक पर्ने सम्पूर्ण बोलपत्र कागजात तयार पार्ने छ ।

श्लेषा इन्जिनियरिङले यसअघि पनि विभिन्न जलविद्युत् आयोजनाहरूको प्राविधिक अध्ययनमा विशेष दक्षता र अनुभव बटुल्दै आएको छ । सम्झौतासँगै आयोजना कार्यान्वयनका लागि प्राविधिक पूर्वतयारीले तीव्रता पाउने र तोकिएको समयभित्रै निर्माण प्रक्रिया सुरु हुने विश्वास प्रवर्द्धक कम्पनीले व्यक्त गरेकाे छ ।