ऊर्जा खबर
काठमाडौं । कर्णाली प्रदेशको सल्यान जिल्लामा विद्युतीकरण तिव्र गतिमा अघि बढेको छ । नेपाल विद्युत प्राधिकरण सल्यान वितरण केन्द्रले विद्युत सेवा विस्तार तिव्र गतिमा अघि बढाएको हो ।
जिल्ला अन्तर्गतका १० स्थानीय तहमा विद्युतीकरण विस्तार बढाएको वितरण केन्द्र प्रमुख अशोक लोहनीले बताए । उनका अनुसार गत एक महिनामा १२ वटा ट्रान्सफर्मर चार्ज गरी सेवा विस्तार गरिएको छ ।
‘हिजो (बुधबार) मात्र बाघचौर नगरपालिकाको बडा नम्बर ७ मा विद्युत सेवा विस्तार गरिएको छ,’ उनले ऊर्जाखबरसँग भने, ‘शितलपाटी सबस्टेसनबाट ल्याएको ११ केभी प्रसारण लाइन चार्ज गरि सेवा सुरु गरिएको हो ।’ ४५ किलोमिटर लामो लाइनबाट १ हजार बढी स्थानीय लाभान्वित हुनेछन् ।
यो पालिकामा मात्र गत एक महिनामा ४ वटा ट्रान्सफर्मर चार्ज गरिएको छ । वडा नम्बर ६, ११, १२ र ७ मा ट्रान्सफर्मर चार्ज गरिएको हो । यो पालिका अन्तर्गतका ४५ प्रतिशत बढी जनसंख्याले विद्युत सेवा उपभोग गरिरहेका छन् ।
यस्तै, छत्रेश्वरी र त्रिवेणी गाउँपालिका, बनगाड कुपिण्डे र सारदा नगरपालिकामा ७० देखि ८० प्रतिशत विद्युतीकरण भइसकेको लोहनीले बताए । उनका अनुसार बाँकी, कालीमाटी, कपुरकोट, कुमुख, सिद्वा कुमुख, धर्मा गाउँपालिकामा करिब ४५/५० प्रतिशत विद्युतीकरण विस्तार भएको छ ।
राष्ट्रिय प्रसारण प्रणालीको विद्युत सेवा नपुगेको विभिन्न स्थानमा आगामी चैतभित्र थप १० देखि १० वटा ट्रान्सफर्मर चार्ज गरि सेवा सुरु गर्ने तयारी भइरहेको पनि केन्द्रले जनाएका छ । केन्द्रका अनुसार चैतभित्र ४ हजार बढी ग्राहक थपिनेछन् ।
विद्युत सेवा नपुगेको अन्य विभिन्न ठाउँमा पनि पालिकाको सहकार्यमा काम भइरहेको छ । जिल्ला पूर्ण विद्युतीकरण गर्न अझै ३ वर्ष लाग्ने पनि लोहनीले बताए । उनका अनुसार विकट, सवारी नपुग्ने गाउँमा आवश्यक सामाग्री बोकेर लानु पर्ने भएकोले समय लाग्ने देखिएको हाे ।
अहिले केन्द्र अन्तर्गत १६ हजार ७ सय ग्राहक छन् । केन्द्र अन्तर्गत १० प्रतिशत विद्युत चुहावट भइरहेको छ ।
