ऊर्जा खबर
गोरखा । नौलो नेपाल हाइड्रो इलेक्ट्रिक कम्पनी प्रालिले गोरखामा बूढीगण्डकी जलविद्युत् आयोजना ‘क’ र ‘ख’ निर्माण गर्ने भएको छ । १०३.४ मेगावाटको बूढीगण्डकी ‘क’ र २२६ मेगावाट क्षमताको बूढीगण्डकी ‘ख’ जलविद्युत् आयोजना बन्ने तरखरमा रहेको आयोजनाका इन्जिनियर दुर्गेश मगरले बताए ।
उनका अनुसार कम्पनीले ३१ अर्ब ३२ करोड रुपैयाँको लागतमा बूढीगण्डकी ‘क’ र ५६ अर्ब ९९ करोड रुपैयाँको लागतमा बूढीगण्डकी ‘ख’ आयोजना निर्माण गर्न लागेको हो । बूढीगण्डकी ‘क’ अन्तरगत, धार्चे–३ को लुस्याङमा बाँध बाँधेर ४ किलोमिटर सुरुङबाट पानी ल्याई माछाखोलामा विद्युत्गृह निर्माण गर्ने योजना कम्पनीको छ ।
आयोजना रन अफ द रिभर प्रविधिको हुनेछ । १११ मिटर अग्लो सतहबाट पानी खसालेर विद्युत् उत्पादन गरिने इन्जिनियर मगरले बताए । सो आयोजनाको माछाखोलामा उत्पादित विद्युत् १२.७ किलोमिटर ट्रान्समिसन लाइन हुँदै बूढीगण्डकी ‘ख’ मा जोडिनेछ ।
२२६ मेगावाट क्षमताको बूढीगण्डकी ‘ख’ को बाँध धार्चे–७ खानीबेंसीमा बाँधिनेछ । त्यहाँबाट ९.५ किलोमिटर सुरुङ हुँदै सोतीमा विद्युत्गृहमा विद्युत् उत्पादन गरिनेछ । नदी प्रवाहमा आधारित (आरओआर) प्रकृतिको सो आयोजनामा १९७.९७ मिटर अग्लो सतहबाट पानी खसालेर विद्युत् उत्पादन गरिने इन्जिनियर मगरले बताए ।
‘यी दुवै आयोजनाको वातावरणीय प्रभाव मूल्याङ्कन (इआइए) र विद्युत् खरिद–बिक्री सम्झौता (पिपिए) भइसकेको छ’, उनले भने, ‘भूकम्पअघि गरेका दुवै आयोजनाको सर्वेक्षणमा भूकम्पको प्रभावपछि भएको हेरफेरको अवस्थाबारे अहिले अन्तिम सर्वेक्षणको काम भइरहेको छ । आउँदो सुक्खायामबाट निर्माणको काम गर्ने तयारी छ ।’
दुवै आयोजनाबाट उत्पादन हुने ३२९.४ मेगावाट विद्युत् १८.५ किलोमिटर टाढा धादिङको लापास्थित सबस्टेसनमा जोडिने छ ।
