ऊर्जा खबर
काठमाडौं । पर्वतको महाशिला गाउँपालिका–६ को विद्युतको माग पूरा गर्न करोडौं लगानीमा निर्माण गरिएको वायु ऊर्जा परियोजना डेढ दशकदेखि अलपत्र बनेको छ । फलामखानी, भँगरा लगायतका सयौँ घरधुरीले विद्युत् उपभोग गर्दै आएको परियोजना विस २०६३ सालदेखि बन्द छ ।
विस २०६० मा स्थापना भएको वायु ऊर्जा (हावाबाट विद्युत निकाल्ने प्रविधि) केन्द्र २०६३ सालमा नै बन्द भएको थियो । यो अलपत्र अवस्थामा पुगेको १७ वर्ष वितिसक्दा पनि अहिलेसम्म मर्मत संभार केही नभएको पालिकाका अध्यक्ष इश्वरीप्रसाद भुसालले बताए ।
वायु ऊर्जा परियोजनामा जडित उपकरण काम नलाग्ने अवस्थामा पुगेपछि स्थानीयले मर्मत गर्न माग गरेका छन् । टिटिविजी नामक संस्थाले एक करोड रुपैयाँ भन्दा बढीको लगानीमा वायु ऊर्जा परियोजना निर्माण गरेको थियो । संरक्षण र मर्मत हुन नसक्दा सुरु भएको एक वर्षमै बन्द भएपछि वायु ऊर्जा आयोजना अहिले अलपत्र अवस्थामा पुगेको स्थानीय ठाकुर रसाइलीले बताए ।
फलामखानीका वडाध्यक्ष गोविन्द विश्वकर्माका अनुसार समुन्द्री सतहदेखि २२०० मिटरको उचाइमा रहेको फलामखानी ढडेनको डाँडामा अत्यधिक मात्रामा हावा लाग्ने भएकाले उक्त वायु ऊर्जा स्थापना गरिएको थियो । वायु ऊर्जा सञ्चालनमा आएपछि फलामखानी, भँगरा लगायतका सयौँ घरधुरीले विद्युत् उपभोग गर्दै आएका थिए ।
अलपत्र परेको आयोजनाको काम अगाडि बढाइदिन सम्बन्धित निकायलाई स्थानीयले आग्रह गरेका छन् । हावाको मापनसमेत गर्न सकिने उक्त डाँडामा आयोजनाको काम पुनः परीक्षण गरी अगाडि बढाउन सकिने उनको भनाइ छ । उक्त योजनाबाट पुनः विद्युत् उत्पादन गरी गाउँका सबै घरधुरीमा विस्तार गर्नका लागि जिल्ला समन्वय समिति, ऊर्जा, जलस्रोत तथा सिँचाई मन्त्रालय लगायतसँग माग गरिएको उनले बताए ।
