ऊर्जा खबर
काठमाडौं । नेपाल आयल निगमले पेट्रोलियम पदार्थको मूल्य फेरि बढाएको छ । निगमले साेमबार राति १२ बजेदेखि लागु हुने गरी पेट्रोलियम पदार्थको मूल्य बढाएर समायोजन गरेको हो ।
अन्तर्राष्ट्रिय बजारमा पेट्रोलियम पदार्थको मूल्य निरन्तर बढिरहेको तथा भारतीय आयल कर्पोरेशनले पनि बढेको नयाँ सूची पठाएकाले स्थानीय बजारमा समेत बढाएर मूल्य समायोजन गरिएको निगमका प्रवक्ता विनितमणि उपाध्यायले बताए ।
उनका अनुसार पेट्रोल, डिजेल, मट्टीतेल र हवाई इन्धन (आन्तरिक उडान) को मूल्य लिटरमा २ रुपैयाँ बढाइएको छ । नयाँ मूल्य सूची अनुसार अब पेट्रोल १२८ रुपैयाँबाट बढेर प्रतिलिटर १३० रुपैयाँ पुगेको छ ।
यस्तै, डिजेल र मट्टीतेलको मूल्य पनि १११ रुपैयाँबाट बढेर ११३ रुपैयाँ पुगेको छ । हवाई इन्धन (आन्तररिक उडान) को नयाँ खुद्रा मूल्य प्रतिलिटर ८६ रुपैयाँ पुगेको उपाध्यायले जानकारी दिए । अन्तर्राष्ट्रिय हवाई इन्धनको मूल्य पनि बढेको छ । अन्तर्राष्ट्रिय हवाई इन्धनको मूल्य प्रतिकिलोटिर १६ अमेरिकी डलर बढाएर ७७० डलर पुर्याइएको उनले जानकारी दिए ।
यो पटक पनि खाना पकाउने एलपी ग्यास महंगो भएको छ । खाना पकाउने एपी ग्यासमा प्रतिसिलिन्डर २५ रुपैयाँ बढेको छ । अब उपभोक्ताले १ सिलिन्डर ग्यास खरिद गर्न १४ सय ५० रुपैयाँ तिर्नुपर्नेछ । निगमले पछिल्लाे पटक गत असार ३ गते पेट्राेलियम पदार्थकाे मूल्य बढाएर समायाेजन गरेकाे थियाे ।
नयाँ मूल्यअनुसार खुद्रा मूल्यमा बिक्री गर्दा पेट्रोलमा प्रतिलिटर ८.४२ रुपैयाँ, डिजेलमा प्रतिलिटर २.६४ र खाना पकाउने एलपि ग्यासमा प्रतिसिलिण्डर ४२०.७५ रुपैयाँ घाटा हुने निगमले जनाएको छ । याे मूल्य समायाेजनपछि पनि १५ दिनमा ९६ करोड ९ लाख रुपैयाँ घाटा हुने निगमकाे भनाइ छ ।
नेपाली बजारमा पेट्रोलियम पदार्थको मूल्य बढाएर समायोजन गर्दा समेत अहिले पनि वीरगन्जसँग सीमा जोडिएको रक्सौलमा पेट्रोल प्रतिलिटर ४१.१९ रुपैयाँ र डिजेल प्रतिलिटर ४४.०४ रुपैयाँ सस्तो रहेको निगमको दाबी छ । अन्तर्राष्ट्रि बजारमा नै पेट्रोलियम पदार्थको मूल्य बढिरहेकाले नेपाली बजारमा पनि मूल्य अझै माथि जान सक्ने निगमले जनाएको छ ।
