ऊर्जा खबर
काठमाडौं । सेतीखोला हाइड्रो पावर लिमिटेड ६० लाख कित्ता सधारण सेयर निष्कासन गर्ने भएको छ । कम्पनीले आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्न लागेको छ ।
कम्पनीले सय रुपैयाँ अंकित ६० करोड रुपैयाँ बराबर ६० लाख कित्ता साधारण सेयर निष्कासन गर्न लागेको छ । कम्पनीले सेयर निष्कासन गरी बाडफाँड गर्न कुमारी क्यापिटल लिमिटेडलाई बिक्री प्रबन्धकमा नियुक्त गरेको छ ।
सम्झौतापत्रमा सेती कम्पनीकातर्फबाट सञ्चालक समितीका अध्यक्ष अनुप आचार्य तथा कुमारी क्यापिटलका तर्फबाट प्रमुख कार्यकारी अधिकृत पुष्प शर्माले हस्ताक्षर गरे ।
कम्पनीको अधिकृत पूँजी एक अर्ब ५० करोड रूपैयाँ, जारी पूँजी एक अर्ब ५० करोड रूपैयाँ, र चुक्ता पूँजी ८८ करोड ४६ लाख ४५ हजार रूपैयाँ रहेको छ ।
कम्पनी विद्युत उत्पादन गर्ने संस्थाको रुपमा २०८० असार २९ गते प्राईभेट लिमिटेडबाट पब्लिक लिमिटेडमा परिणत भएको संस्था हो । कम्पनीमा डोल्मा इम्प्याक्ट फन्ड दोस्राको ४९ प्रतिशत लगानी रहेको छ । बाँकी ५१ प्रतिशत सेयर संस्थाका अध्यक्ष अनुप आचार्य, दिपक बराललगायतका पोखराका स्थानिय बासिन्दाहरूको रहेको छ । कम्पनीले २२ मेगावाटको सेती खोला निर्माण गरिरहेको छ ।
