ऊर्जा खबर
काठमाडौं । देशका विभिन्न स्थानमा उच्च क्षमताका १०७ विद्युत प्रसारण लाइन आयोजना निर्माणका विभिन्न चरणमा छन् । नेपाल विद्युत प्राधिकरणले निजी ऊर्जा उत्पादकले निर्माण गरिरहेको जलविद्युत आयोजनाको विद्युत प्रवाह गर्न तथा प्रसारण प्रणालीको सञ्चालन विस्तार गर्न यी प्रसारण लाइन आयोजना निर्माण गरिरहेको हो ।
विद्युत विकास विभागका अनुसार १३२ केभीदेखि ४ सय केभी क्षमतासम्मका १०७ प्रसारण लाइन आयोजना निर्माण गर्न अनुमति जारी गरिएको छ । विभागका अनुसार यी आयोजना निर्माणका विभिन्न चरणमा छन् । १३२ कृभी क्षमताका ८०, २२० केभी क्षमताका २३ र ४०० केभी क्षमताका ४ प्रसारण लाइनले निर्माण अनुमति पाएका छन् ।
अनुमतिपत्र जारी भएका लाइनमध्ये ४ सय केभीका ४ प्रसारण लाइन आयोजना छन् । ढल्केबर–बिर्तामोड, हेटौडा–ढल्केबर–इनरुवा, तामाकोसी–काठमाडौं र अरूण–३ रहेको विभागको तथ्याङ्कमा उल्लेख छ ।
हेटौंडा–ढल्केबर–इनरुवा डबल सर्किट प्रसारण लाइन आयोजना अहिले निर्माणाधीन छ । मकवानपुरको हेटौंडादेखि सुनसरीको इनरुवासम्म २ सय ८५ किलोमिटर लामो प्रसारण लाइन आयोजनाको निर्माण भइरहेको हो । प्रसारण लाइनअन्तर्गत ७ सय ९२ वटा टावर निर्माण हुनेछन् ।
यस्तै, ३९ किलोमिटर लामो ढल्केबर–बिर्तामोड प्रसारण लाइन निर्माण गर्न नेपाल विद्युत प्राधिकरणले २०६८ भदौमा अनुमति पाएको विभागको तथ्याङ्कमा उल्लेख छ ।
तामाकोसी–काठमाडौं प्रसारण लाइन आयोजना पनि निर्माणाधीन छ । दोलखा, रामेछाप, सिन्धुपाल्चोकलगायत जिल्लामा उत्पादन हुने विद्युत काठमाडौं ल्याउन यो प्रसारण लाइन आयोजना निर्माण भइरहेको हो । यो प्रसारण लाइन निर्माण गर्न २०७४ कात्तिक २७ गते अनुमतिपत्र दिइएको थियो । सय किलोमिटर लामो प्रसारण लाइन पूरा भएपछि करिब ५ सय मेगावाट विद्युत प्रवाह गर्न सकिनेछ ।
भारतीय लगानीमा निर्माणाधीन ९ सय मेगावाटको अरुण–३ जलविद्युत आयोजनाको विद्युत प्रवाह गर्न ४ सय केभी प्रसारण लाइन निर्माण हुँदैछ । २ सय १७ किलोमिटर लामो प्रसारण लाइन आयोजना निर्माण गर्न विभागले २०७५ माघ २७ गते अनुमतिपत्र दिएको छ । यही प्रसारण लाइनमार्फत अरुण–३ ले उत्पादन गरेको विद्युत भारत जानेछ । यस्तै, २२० केभी र १३२ केभी क्षमताका लाइन आयोजना पनि निर्माणका विभिन्न चरणमा छन् ।
