ऊर्जा खबर
काठमाडौँ । सेती हाइड्रो पावर प्रालिले कास्कीको मुसेतोडामा निर्माण गरिरहेको २२ मेगावाटको सेती खोला जलविद्युत् आयोजनाको काम ६२ प्रतिशत पूरा भएको छ । पोखरा महनागरपालिका वडा नम्बर ३३ मा निर्माणाधीन आयोजनाकाे काम एक वर्षभित्र पूरा गर्ने गरी तीव्रता दिइएकाे छ ।
अहिले बाँध, विद्युत्गृह सुरुङ लगायत सबै भागको काम एकसाथ भइरहेको आयोजना प्रमुख उज्वल रेग्मीले बताए । ‘अस्थायी बाँध (कफर ड्याम) निर्माण गरी खोला फर्काउने काम, डिस्यान्डर र फ्लसिङ क्यानलको निर्माण सकिएको छ,’ उनले ऊर्जा खबरसँग भने ।
आयोजनाको मुख्य सुरुङ ३१०५ मिटर र पेनस्टक पाइप लाइन १ किलोमिटर छ । सुरुङको काम ८० प्रतिशत पुरा भइसकेको छ, भने पेनस्टक पाइप बिछ्याउनका लागि खन्ने काम सकिएको छ । पाइप बिछ्याउने काम पनि ३० प्रतिशत बढी सकिएको रेग्मीले बताए ।
आयोजना सम्पूर्ण काम पूरा गर्न ५ अर्ब ५ करोड रुपैयाँ लागत अनुमान गरिएको छ । आयोजनामा ७५ प्रतिशत ऋण लगानी र २५ प्रतिशत स्वपुँजी लगानी छ । आयोजनामा कुमारी बैंक लिमिटेडको अगुवाईमा नबिल बैंक र नेपाल पूर्वाधार विकास बैंकको लगानी रहेको छ । स्वपुँजीमध्ये डोल्मा इम्प्याक्ट फण्ड–२ ले ४९ प्रतिशत, सर्वसाधारणले ३० प्रतिशत र बाँकी संस्थापकहरूको लगानी छ ।
आयोजनाको सबै काम पूरा गरेर २०८१ मंसिरभित्र विद्युत् उत्पादन गर्ने लक्ष्यका साथ काम भइरहेको पनि रेग्मीले जानकारी दिए । आयोजनाबाट वार्षिक १३३.४३२ गिगावाट घण्टा ऊर्जा उत्पादन हुने अध्ययनले देखाएको छ । उत्पादित विद्युत १.५ किलोमिटर प्रसारण लाइनमार्फत लेखनाथ–दमौली १३२ केभीमा ‘लुप इन लुप आउट’ प्रविधिमा जडान हुनेछ ।
आयोजनाको संरचनाहरू हेडवर्क, सेटलिंग बेसिन, हेडरेस सुरुङ, सर्ज ट्यांक, पेनस्टक पाइप, विद्युतगृह, टेलरेस र स्विचयार्ड छन् । आयोजनाको बाँध पृथ्वी राजमार्गको गगनगौडादेखि २ किलोमिटर दूरीमा अवस्थित छ ।
आयोजनाको थप विवरण
आयोजना : सेती खाेला जलविद्युत्
क्षमता : २२ मेगावाट
प्रवर्द्धक : सेती हाइड्रो पावर प्रा.लि
आयोजनास्थल : कास्की
लागत : ५ अर्ब ५ करोड रुपैयाँ
ऋण लगानी : ७५ प्रतिशत (२५ प्रतिशत स्वपुँजी)
वार्षिक विद्युत उत्पादन : १३३.४३२ गिगावाट घण्टा
