ऊर्जा खबर
काठमाडौं । २६ मेगावाटको माथिल्लो खुदी जलविद्युत आयोजनामा ५ बैंकले लगानी गर्ने भएका छन् । लमजुङमा निर्माण हुने आयोजनामा बैंक अफ काठमाडौंको अगुवाईमा ग्लोबल आइएमइ, मेगा, सिभिल र एनसिसी बैंकले ३ अर्ब ३ करोड रुपैयाँ लगानी गर्न लागेका हुन् ।
आयोजनाको प्रवद्र्धक सुपर खुदी हाइड्रोपावर कम्पनी र ऋण लगानी गर्ने बैंकहरूबीच सोमबार (हिजो) वित्तीय व्यवस्थापन सम्झौतामा हस्ताक्षर भएको छ । कूल ४ अर्ब १९ करोड रुपैयाँ लागत अनुमान गरिएको आयोजनामा बैंकले गर्ने ऋण लगानी ७० प्रतिशत हो ।
३० प्रतिशत स्वपुँजी लगानी प्रवद्र्धक कम्पनीले गर्दैछ । कम्पनीले गर्ने १ अर्ब १६ करोड रुपैयाँ स्वपुँजी लगानी रहनेछ ।
आयोजनाको संरचना निर्माण गर्नुअघि नेपाल विद्युत प्राधिकरण, विद्युत विकास विभाग, वन तथा वातावरण मन्त्रालयबाट गर्नुपर्ने सबै कानुनी प्रक्रिया पुरा भइसकेको कम्पनीले जनाएको छ ।
कम्पनीका अनुसार कानुनी प्रक्रिया सबै पूरा भइसकेकाले चालू आर्थिक वर्षबाटै आयोजनाको संरचना निर्माणको काम सुरु गरिने भएको छ ।
कम्पनी र प्राधिकरणबीच २०७५ जेठ १० गते आयोजनाको विद्युत खरिद सम्झौता (पिपिए) मा हस्ताक्षर भएको थियो । पिपिएअनुसार आयोजनाले उत्पादन गर्ने विद्युत हिउँदमा प्रतियुनिट ८.४० रुपैयाँ र बर्खामा ४.८० रुपैयाँमा प्राधिकरणले खरिद गर्नेछ ।
निर्माण सुरु गरेको ३ वर्षमा आयोजना सम्पन्न गरी विद्युत उत्पादन गर्ने लक्ष्य रहेको छ । प्राधिकरणले आयोजनाबाट २०८० साल माघदेखि विद्युत उत्पादन सुरु गर्नुपर्ने तालिका दिएको छ ।
आयोजनाले उत्पादन गर्ने विद्युत ५ किलोमिटर दुरीमा रहेको ताडीकुना सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गर्नेछ ।
