ऊर्जा तथा जलविद्युत पूर्वाधारमा काम गर्ने मुडभरी एन्ड जोशी कम्पनी कालोसूचीमा

काडमाडौं । ऊर्जा तथा जलविद्युत पूर्वाधार निर्माणमा काम गर्ने मुडभरी एण्ड जोशी कन्स्ट्रक्सन प्रालि कालोसूचीमा परेको छ । सार्वजनिक खरिद अनुगमन कार्यालयले समयमा काम नगरेको र ठेक्का लिएर आयोजना अलपत्र पारेको भन्दै कालोसूचीमा राखेको हो ।

सार्वजनिक खरिद ऐन, २०६३ को दफा ६३ को उपदफा (१) बमोजिम फागुन १० गतेदेखि २०८१ फागुन ८ गतेसम्मका लागि कालो सूचीमा राखेको अनुगमनले जनाएको छ । कालो सूचीमा परेको यो कम्पनीले कालोसूची अवधिभर सरकारी टेन्डरमा सहभागि हुन पाउने छैन्, साथै, अन्य कालोसूचीमा नपरेका निर्माण कम्पनीसँग मिलेर पनि ठेक्का प्रक्रियामा भाग लिन पाउने छैन् ।

रसुवामा १११ मेगावाटको रसुुवागढी निर्माण गरिरहेको प्रवर्द्धक रसुवागढी हाइड्रो पावर कम्पनीले सम्झौता अनुसार काम नभएको वा गुणस्तर कायम नगरेको भन्दै कालोसूचीमा राख्न सिफारीस गरेको थियो । सोहीअनुरुप अनुगमनले मुुडभरीलाई २ वर्षका लागि कालो सूचीमा राखेको छ ।

रसुवागढीले मुडभरीको कमजोर कार्यसम्पादनका कारण प्रसारण लाइनको निर्माण कार्यले गति लिन नसकेपछि २०७९ भदौमा सम्झौता रद्द गरेको थियो । मुडभरीले १८ महिनामा सक्नुपर्ने जलविद्युत आयोजनाको विद्युतगृहदेखि चिलिमे हब सबस्टेसनसम्मको १० किलोमिटर लाइन ५ वर्षमा पनि सम्पन्न गर्न सकेको थिएन् ।

विविध कारण पटकपटक म्याद थप गर्दा पनि ठेकेदारको कमजोर कार्यसम्पादनका कारण लाइनको निर्माण सुस्त भएकोले ठेक्का तोडिएको थियो । उक्त कम्पनीले ठेक्का पाएका दर्जनाैं प्रसारण तथा वितरण लाइन समस्यामा छन्, समयमा निर्माण हुन सकेका छैनन् । यही कारण उत्पादित विद्युत खपत हुन सकिरहेकाे छैन ।