ऊर्जा खबर
काठमाडौं । नेपाल विद्युत प्राधिकरणले ६६ केभी चपली–चावहिल प्रसारण लाइनको विद्युत सेवा बन्द गरेको छ । प्राधिकरणले लाइनको पुरानो तथा जिर्ण कन्डक्टर बदली गर्नका लागि सेवा बन्द गरेको हो ।
नेपाल सरकार र प्राधिकरणको सयुक्त लगानीमा सञ्चालित प्रसारण लाइनको चपली–चावहिल (सर्किट–२) खण्डको कन्डक्टर बदलीका लागि सेवा बन्द गरिएको प्राधिकरणले जनाएको छ । प्राधिकरणका अनुसार गत सोमबार (५ गते) देखि सेवा बन्द भएको छ ।
सेवा आगामी माघ ४ गतेसम्म बन्द हुनेछ । प्राधिकरणका अनुसार विद्युत दैनिक बिहान ७ बजेदेखि साँझ ५ बजेसम्म बन्द हुनेछ । तोकिएको समयअगावै काम सम्पन्न भए निर्धारित समयअगावै सेवा सुरु हुनेछ ।
प्राधिकरणले यसअघि पनि ६६ केभी चपली–चावहील लाइनको सर्किट–१ को लाइन बन्द गरी पुरानो तथा जिर्ण कन्डक्टर बदलीको काम गरिरहेको छ । प्राधिकरणले गत मंसिर ५ गतेदेखि सेवा बन्द गरेर बदलीको काम गरिरहेको छ । यो खण्डको पुरानो तथा जिर्ण कन्डक्टर बदलीको काम आगामी शुक्रबार (९ गते) सम्म हुनेछ ।
हेटौडा–परवानीपुर डबल सर्किटको विद्युत सेवा पनि ६ दिन बन्द हुने
६६ केभी हेटौडा–परवानीपुर डबल सर्किट प्रसारण लाइनको विद्युत सेवा पनि ६ दिन बन्द हुने भएको छ । प्राधिकरण र नेपाल सरकारको संयुक्त लगानीमा सञ्चालित लाइनको टावर नम्बर ३२३ देखि परवानीपुर सबस्टेसनको ग्यान्ट्रीको बिचमा एउटा टावर थप गर्न र कन्डक्टर बदली गर्ने कार्यका लागि सेवा बन्द गर्न लागिएको हो ।
टावर खडा गर्ने र सबस्टेसनभित्र टावरको काम गर्नुपर्ने हुँदा परवानीपुर सबस्टेसनबाटा ६६ केभी हेटौडा फिडर–१ र २ बन्द गरिनेछ । सेवा बिहीबार (८ गते) देखि मंगलबार (१३ गते) सम्म बन्द हुनेछ । तोकिएको समयअगावै काम सम्पन्न भए निर्धारित समय अगावै अवरुद्व सेवा सुरु गर्ने पनि प्राधिकरणले जनाएको छ ।
