ऊर्जा खबर
काठमाडौं । नेपाल विद्युत प्राधिकरणले उच्च क्षमताका ३५ ग्रीड सबस्टेसन निर्माण गर्ने भएको छ । प्राधिकरणले विद्युत प्रसारणको प्रणाली सुधार तथा गुणस्तरीय सेवा दिने उदेश्यले विभिन्न प्रसारण लाइन आयोजना अन्तर्गत नयाँ सबस्टेसन निर्माण गर्न लागेको हो ।
नेपालको विभिन्न ठाउँमा विद्युत प्रणाली सुधार गर्न प्रसारण लाइन निर्देशनालय अन्तर्गत २० सबस्टेसन र आयोजना व्यवस्थापन निर्देशनालय अन्तर्गत१५ गरी ३५ ग्रीड सबस्टेसन निर्माण गर्न लागेको प्राधिकरणको तथ्याङ्कमा छ । प्राधिकरणका अनुसार ४०० केभी क्षमताका १०, २२० केभी क्षमताका ४ र १३२ केभी क्षमताका २१ सबस्टेसन निर्माण अघि बढाउने तयारी भइरहेकाे छ ।
निर्माण गर्न लागेका आयोजनामध्ये ४०० केभी क्षमताका भेरी कोरिडोर अन्तर्गत बफिकोट, न्यू–बुटवल–लामाही–कोहलपुर–न्यू लम्की–न्यूअत्तरिया अन्तर्गत लम्की, न्यू कोहोलपुर र न्यू–अत्तरिया सबस्टेसन निर्माण गर्न लागिएको छ ।
यस्तै, ४०० केभी क्षमताकै लिखु हब, सुनकोसी हब, फिलिम/गुम्दा, कुस्मा, बुर्तिभाङ र बफिकोट सबस्टेसन निर्माण गर्न लागिएको प्राधिकरणको ‘प्रसारण/आयोजना व्यवस्थापन निर्देशनालय’ नामक पुस्तकमा उल्लेख छ ।
२२० केभी क्षमतका लेखनाथ दमौली अन्तर्गत लेखनाथ र दमौली, धाउबडी अन्तर्गत धाउबडी र पाल्पा अन्तर्गत पाल्पा सबस्टेसन निर्माण गर्ने प्राधिकरणले जनाएको छ ।
यस्तै, १३२ केभी क्षमताका अनारमनी, हरनिया, सुखीपुर, बोडेबर्साइन, सुखदेबचौर, बिरौता, पर्साउनी, सेफबगर, राकाढुङ्गा, फापरबारी, घर्तीगाउँ, थपाथली, राज दरबार, महाराजगन्ज, सिरुटार, नेपालगञ्ज, दुम्किबास, मुलपानी, कालिकोट, जुम्ला, काभ्रे र रामेछाप सबस्टेसन निर्माण गर्ने प्राधिकणको तथ्याङ्कमा उल्लेख छ ।
