ऊर्जा खबर
काठमाडौं । मौसम बदली भई शुक्रबारदेखि आएको हावाहुरीसँगैको वर्षाले प्रसारण तथा वितरण लाइनको संरचनामा क्षति पुर्याउँदा चितवनको विद्युत आपूर्तिमा समस्या देखिएको छ । हावाहुरीले विभिन्न स्थानमा संरचनामा क्षति पुर्याउँदा आपूर्तिमा समस्या आएको हो ।
वितरण प्रणालीमा समस्या आउँदा चितवनको ५० प्रतिशत क्षेत्र विद्युतको पहुँच बाहिर रहेको नेपाल विद्युत प्राधिकरण भरतपुर वितरण केन्द्र प्रमुख राजिव सिंहले बताए । ‘शुक्रबार रातीको हावाहुरी र वर्षाले धेरै ठाउँमा पोल ढल्ने, तार चुँडिने जस्ता समस्या आएर लाइन अवरुद्ध भएको थियो’, उनले भने, ‘शनिबारसम्म धेरै ठाउँको आपूर्ति सुचारु भइसकेको थियो । शनिबार रातीदेखि आएको वर्षा र हावाहुरीले फेरी विभिन्न ठाउँमा समस्या देखिएको छ ।’
वर्षा र हावाहुरीले केन्द्र अन्तर्गतको १०० थान बढी पोल र २ वटा ट्रान्सफर्मर पोष्टमा क्षति पुर्याएको छ । क्षति पुगेको पोलमध्ये १५\२० वटामा सामान्य क्षति पुगेकोले मर्मत गरेर लाइन सूचारु गरिएको छ । बाँकी सबै नयाँ पोल परिवर्तन गर्नुपर्नेछ ।
शनिबारसम्म हस्पिटल फिडर, भरतपुर–१ फिडर, भरतपुर–२, गितानगर, रामपुर, फलवारी फिडर मर्मत संभार गरी लाइन सुचारु गरिएको केन्द्रले जनाएको छ । बाँकी क्षेत्रमा मर्मत कार्य भइरहेको छ ।
केन्द्र अन्तर्गत ८ वटा ग्रुपले मर्मत कार्य गरिरहेका छन् । केन्द्रका २ र ठेकेदारका ६ ग्रुपले समस्या भएको ठाउँ पहिचान गरि मर्मत संभारको कार्य गरिरहेका छन् ।
यस्तै, धरान वितरण केन्द्रको पनि ३५ किलोमिटर लामो ३३ केभी दुहबी–धरान वितरण लाइन अवरुद्ध छ । हावाहुरीले विद्युतीय संरचनामा क्षति पुर्याउँदा सेवा अवरुद्ध भएको केन्द्रले जनाएको छ । केन्द्रका अनुसार अहिलेसम्म समस्या पहिचान भइनसकेकोले खोज्ने काम भइरहेको छ ।
