सर्वसाधरणका लागि ६ लाख कित्ता सेयर निष्कासन गर्दै रावा इनर्जी

काठमाडौं । रावा इनर्जी डेभलपमेन्ट लिमिटेडले सर्वसाधरणका लागि ६ लाख कित्ता ाधारण सेयर निष्कासन गर्ने भएको छ । कम्पनीले सर्वसाधारणका लागि छुट्याएको सेयर जेठ १८ गतेदेखि निष्कासन गर्न लागेको हो । 

कम्पनीको जारी पूँजी २८ करोडको ३० प्रतिशत अर्थात ८ करोड ४० लाख रकम बराबरको सय रुपैयाँ अंकित ८ लाख ४० हजार किब साधरण सेयर मध्येको ५६ हजार कित्ता वैदेशिक रोजगारीमा रहेका नेपालीहरुका लागि तथा २ लाख ८० हजार कित्ता सेयर प्रभावित क्षेत्रका स्थानीय बासिन्दाका लागि निष्कासन गरी ८७ हजार ६ सय ७० कित्ता सेयर बाँडफाँड गरिएको कम्पनीले जनाएको छ । कम्पनीका अनुसार स्थानीयमा बिक्री नभइ बाँकी रहेको १ लाख ५२ हजार ३ सय ३० कित्ता सेयर थप गरी ६ लाख ५६ हजार ३ सय ३० कित्ता सेयरमध्येको १५ हजार ४७ कित्ता कम्पनीका कर्मचारीका लागि, ३७ हजार ६ सय १६ कित्ता सामूहिक लगानी कोषका लागि बाँडफाँड गरी बाँकी रहेको ६ लाख ४३ हजार ६ सय ६७ कित्ता सेयर सर्वसाधारणका लागि निष्कासन गर्ने तयारी गरिएको हो । 

सर्वसाधारणले न्यूनतम १० कित्तादेखि अधिकतम १० हजार कित्तासम्म आवेदन दिन पाउनेछन् । सर्वसाधारणले छिटोमा जेठ २२ गतेसम्म र ढिलोमा जेठ ३२ गतेसम्म आवेदन दिन सकिनेछ । 

कम्पनीको सेयर निष्कासन गरी बाँडफाँड गर्न प्रभु क्यापिटल लिमिटेडलाई बिक्री प्रबन्धक तोकिएको छ । कम्पनीको खोटाङमा ३ मेगावाटको माथिल्लो रावा खोला साना जलविद्युत आयोजना सञ्चालनमा छन् भने २.५ मेगावाटको मध्य रावा खोला खोला जलविद्युत आयोजना निर्माणाधीन छन् । 

कम्पनीले निर्माण गरी सञ्चालन गरेको ३ मेगावाटको माथिल्लो रावा खोला साना जलविद्युत आयोजनाको कुल लागत सहित प्रति मेगावाट २१ करोड ५५ लाख रहेको छ र जलविद्युत आयोजनको कुल लागत भने ६४ करोड ६५ लाख रहेको छ ।