ऊर्जा खबर
काठमाडौं । पाटन–स्यूचाटार ६६ केभी प्रसारण लाइन एक महिनाका लागि बन्द भएको छ । नेपाल विद्युत प्राधिकरणले पाटन–स्यूचाटार खण्डको लाइनको जिर्ण तथा पुराना कण्डक्टर बदलीका गर्नका लागि सेवा बन्द गरेको हो ।
लाइन पुरानो र जीर्ण हुँदै गएकाले सेवाग्राहीलाई गुणस्तरीय, भरपर्दो सेवा प्रवाहको सुनिश्चितताका लागि विद्युत लाइन पुराना तथा जिर्ण कन्डक्टर बदली गर्न लागिएको प्राधिकरणले जनाएको छ । प्राधिकरणका अनुसार शनिबार (२०७८ चैत ५ गते) बिहान ७ बजेदेखि लाइन बन्द गरी पुरानो र जिर्ण कन्डक्टर बदलीको काम सुरु भएकाे छ । लाइनको मर्मत तथा स्तरोन्नति गर्न २०७९ बैशाख ४ गतेसम्म लाग्नेछ । प्रसारण लाइनको मर्मत तथा स्तरोन्नति गर्ने अवधिभर दैनिक १२ घन्टा प्रसारण लाइन बन्द हुनेछ ।
लाइन बन्द हुँदा विद्युत प्रवाह अनियमीत हुँदा यसको असर विद्यमान पाटन र टेकू ६६ केभी सबस्टेसनमा पर्नेछ । कन्डक्टर बदलीको कार्य गर्दा विद्यमान पाटन र टेकु सबस्टेसनबाट निकालिएको ११ केभी फिडरहरुबाट विद्युत आपूर्ति कटौति हुनसक्ने प्राधिकरणले जनाएको छ ।
कन्डक्टर बदलीको काम सम्पन्न गरी आगामी बैशाख ४ गते लाइन सञ्चालन गरिनेछ । तोकिएको समयअगावै बदलीको काम सकिए निर्धारित तालिकाअगावै सेवा सूचारु गरिनेछ ।
