ऊर्जा खबर
काठमाडौं । नेपाल विद्युत प्राधिकरणले सडक पोलमा जडान भएका बत्तीहरूको विद्युतको महसुल भुक्तानी गर्न आग्रह गरेको छ । विद्युत महसुल बक्यौतामा ठूलो हिस्सा सडक बत्तीमा रहेकाले रकम भुक्तानी गर्न आग्रह गरेको हो ।
सडक बत्तीको महसुल भुक्तानी नहुँदा ठुलो नोक्सानी व्यहोर्नुपरेको भन्दै प्राधिकरणले महसुल बुझाउन आग्रह गरेको छ । महानगरपालिका, उप–महानगरपालिका, नगरपालिका, गाउँपालिका र वडा कार्यालयहरूलाई सडक बत्ती जडान गरेवापतको रकम भुक्तानी गर्न प्राधिकरणले आग्रह गरेको छ ।
प्राधिकरणका अनुसार स्थानीय निकायले प्राधिकरणको सहमति नलिई आफुखुसी सडक बत्ती जडान गर्ने क्रम बढ्दो रहेको र सडक बत्तीको विद्युत शक्ति मापन हुन नसक्दा र मापन गरिएको विद्युत खपतको समेत महसुल भुक्तानी नहुँदा ठूलो नोक्सानी व्यहोर्नुपरेको छ ।
सडक बत्तीको बाँकी बक्यौता विद्युत महसुल शिघ्र भुक्तानी गर्नुपर्ने, प्राधिकरण अन्तर्गतको वितरण केन्द्रहरूको सहमति नलिई विद्युत लाइनबाट सडक बत्ती जडान नगर्न पनि अनुरोध गरेको छ ।
जडित सडक बत्तीको विद्युत खपत मापनका लागि आगामी ४५ दिनभित्र मिटर जडान गर्न आग्रह गरेको छ । सडक बत्तीका लागि सिङ्गल फेज इनर्जी मिटर प्राधिकरणले निःशुल्क उपलब्ध गराउने जनाएको छ ।
एउटा सिङ्गल फेज इनर्जी मिटरबाट १०० वाटको ५० वटाभन्दा बढी सडक बत्तीको विद्युत खपत मापन गर्न सकिने हुँदा प्रत्येक सडक बत्तीलाई छुट्टाछुट्टै इनर्जी मिटर उपलब्ध नगराइने र मिटरको क्षमता तथा सडक बत्ती जडान गरेको क्षेत्रको आधारमा सम्बन्धित वितरण केन्द्रसँग समन्वय गरी स्थानीय निकायले छुट्टै केवल तानी सडक बत्तीका लागि मिटर जडान गर्नुपर्ने प्राधिकरणले जनाएको छ ।
साथै, तोकिएको समयमा सडक बत्तीमा मिटर जडान नगरेमा वा विद्युत महसुल बाँकी बक्यौता भुक्तानी नगरेमा प्रचलित नियमानुसार कारबाही गर्ने प्राधिकरण वितरण तथा ग्राहक सेवा निर्देशनालयले चेतावनी दिएको छ ।
