ऊर्जा खबर
काठमाडौं । कास्कीको मादी खोलामा १२ मेगावाटको नामार्जुन मादी जलविद्यूत आयोजना निर्माण गरी सञ्चालनमा ल्याएको हिमालयन हाइड्रो पावर कम्पनीले आगामी (असार) १५ गतेदेखि १९ लाख कित्ता सेयर निष्कासन गर्ने भएको छ । कम्पनीले सर्वसाधरणका लागि छुट्याएको साधारण सेयर निष्कासन गर्न लागेको हो ।
आयोजना प्रभावित स्थानीय बासिन्दालाई छुट्याएको सेयर बाँडफाँड गरी बिक्री हुन बाँकी रहेको ६ लाख १९ हजार २५० कित्ता सहित साधारण सेयर निष्कासन गर्ने तयारी भइरहेको कम्पनीले जनाएको छ । कम्पनीका अनुसार सय रुपैयाँ अंकित १९ लाख ६८ हजार २ सय ५० कित्ता सेयर सर्वसाधरणका लागि निष्कासन गरिनेछ ।
कम्पनीको सेयर खरिदका लागि सर्वसाधरणले छिटोमा असार १९ गतेसम्म र ढिलोमा असार २९ गतेसम्म आवेदन दिनुपर्नेछ । कम्पनीको सेयर निष्कासन तथा बाँडफाँड गर्न ग्लोबल आइएमई क्यापिटललाई बिक्री प्रबन्धक तोकिएको छ ।
सर्वसाधारणले न्यूनतम १० कित्तादेखि अधिकत्तम १ हजार कित्ता सम्म आवेदन दिन सकिनेछ । पहिलो चरणको आयोजना प्रभावित स्थानीयका लागि छुट्याएको सेयर बाँडफाँड गरिसकेपछि दोस्रो चरणमा सर्वसाधरणका लागि छुट्याएको साधारण सेयर निष्कासन गर्न लागिएको हो ।
