ऊर्जा खबर
काठमाडौं । नेपाल विद्युत प्राधिकरण बागमती प्रदेश डिभिजन कार्यालय हेटौंडाले आइसोलेसन वार्ड तयार गरेको छ । कार्यलयमा कार्यरत कुनै कर्मचारी कोरोना (कोभिड–१९) संक्रमित भएमा उनीहरूलाई आइसोलेसनमा राख्ने वार्ड तयार गरिएको हो ।
अहिले डिभिजन कार्यालयका कर्मचारीका लागि ५ बेडको आइसोलेसन वार्ड तयार गरेको प्रमुख शशीभुषण शाहले बताए । उनका अनुसार अहिलेसम्म डिभिजन कार्यालयमा कार्यरत कुनै कर्मचारी संक्रमित भइनहालेको भए पनि तयारीस्वरू वार्ड बनाइएकाे हाे ।
‘हाम्रा कर्मचारी साथीहरू सुरक्षाको मापदण्ड पालना गरेरै काममा खटिनु भएको छ,’ उनले ऊर्जा खबरसँग भने, ‘सुरक्षित हुँदा हुँदै पनि कोही संक्रमित भइहालेमा अलग्गै क्वारेन्टीनमा राख्न आइसोलेसन वार्ड तयारी अवस्थामा राखेका हौं ।’
उनले केही दिनमै कुलेखानी पहिलो र दोस्रो जलविद्युत केन्द्रका कर्मचारीका लागि पनि आइसोलेसन वार्ड बनाउने तयारी भइरहेको बताए । हालै मात्र बागमती प्रदेशमा कार्यरत प्राधिकरणका ४२ कर्मचारी कोरोना संक्रमित भएका थिए ।
अन्य प्रदेशमा पनि प्राधिकरण कर्मचारी संक्रमित भइरहेका छन् । निशेधाज्ञामासमेत प्राधिकरणका कर्मचारी काममा खटिएकाले उनीहरूमा कोरोना संक्रमित हुने जोखिम उच्च छ ।
