साढे ७ कराेड विद्युत् महसुल नबुझाउने वीरगंजका १८२३ ग्राहक कालोसूचीमा

काठमाडाैं । नेपाल विद्युत् प्राधिकरण वितरण केन्द्र वीरगंजका १८२३ ग्राहकलाई कालाेसूचीमा राखेकाे छ । लामो समयदेखि विद्युत् महसुल नबुझाउने ग्राहकलाई कालोसूचीमा राखी केन्द्रले कारबाही प्रक्रिया अघि बढाएको हाे ।

विद्युत् उपभोग गरे पनि लामो समयसम्म महसुल नबुझाउने ग्राहकलाई कालोसूचीमा राखेर बक्यौता असुल्न कारबाही अघि बढाइएको केन्द्रले जनाएकाे छ । कार्यालय प्रमुख अवधेश दुबेका अनुसार कालोसूचीमा रहेका ग्राहकको तीनपुस्ते विवरण यकिन गर्न कर्मचारीको टोली परिचालन गरिएको छ । टोलीले यकिन गरेपछि ग्राहकमाथि थप कारबाही अघि बढाइने प्रमुख दुबेले बताए।

कालोसूचीमा रहेका ग्राहकबाट ७ करोड ६५ लाख ५६ हजार ७ सय ६३ रुपैयाँ बक्यौता रकम उठाउन बाँकी रहेकाे पनि दुबेले जानकारी दिए । लामो समयदेखि वर्षा नहुनु, बढ्दो गर्मी र पर्सा-बारा काेरिडोरका औद्योगिक क्षेत्रका उद्योगमा विगतको भन्दा कम विद्युत्‌काे उपयोग हुनुजस्ता कारणले आर्थिक वर्ष (आव) २०७९/८० मा विद्युत् चुहावट ०.५ प्रतिशतले बढेको छ । गत आव २०७८/७९ मा विद्युत् चुहावट ४.९८ प्रतिशत रहेकामा आव २०७९.८० मा ५.०३ प्रतिशत विद्युत् चुहावट भएको प्रमुख दुबेले जानकारी दिए।

आव २०७९/८० मा विद्युत् महसुल नबुझाउने २ हजार ४ सय ६८ ग्राहकको विद्युत् लाइन काट्दा १ हजार ९ सय ६ ग्राहकबाट ११ करोड ४० लाख ७२ हजार ६ सय १५ रुपैयाँ बाँकी बक्यौता रकम असुली भएको केन्द्रका इन्जिनियर निर्मला फौजदारले बताइन्।

त्यस्तै, सो अवधिमा हुकिङ गरी विद्युत् चुहावट गर्ने ७१ जनालाई पक्राउ गरी जरिवानाबापत १२ लाख २४ हजार ७ सय २४ रुपैयाँ राजस्व संकलन भएको जानकारी दिइन् ।

आव २०७९/८० मा २ हजार ४ सय ४२ नयाँ ग्राहक थपिएको छ । योसँगै वीरगंज क्षेत्रमा ग्राहकको सङ्ख्या ५४ हजार २ सय ३ पुगेको विद्युत् प्राधिकरण वितरण केन्द्र वीरगंजले जनाएको छ।