ऊर्जा खबर
काठमाडौं । मध्यभोटेकोसी जलविद्युत कम्पनीले साधारण सेयर निष्कासन गर्न नेपाल धितोपत्र बोर्डबाट अनुमति पाएको छ । कम्पनीले सिन्धुपाल्चोकमा निर्माणाधीन १ सय २ मेगावाटको मध्य भोटेकोसी जलविद्युत आयोजनाको स्थानीय र सर्वसाधारणका लागि छुट्याएको सेयर निष्कासन गर्न अनुमति पाएको हो ।
प्रतिकित्ता १ सय रुपैयाँ अंकित १ अर्ब ५० करोड रुपैयाँ बराबरको १ करोड ५० लाख कित्ता सेयर निष्कासन अनुमति पाएको कम्पनीले जनाएको छ । कम्पनीका अनुसार दोस्रो चरणमा स्वपुँजी लगानीको २५ प्रतिशत हुन आउने सेयर निष्कासन गर्न बोर्डले बैशाख ५ गते अनुमति दिएको हो ।
कम्पनीले निष्कासन गर्ने साधारण सेयरमध्ये ६० लाख कित्ता सेयर आयोजना प्रभावित स्थानीयका लागि छुट्याइएको छ । बाँकी १५ प्रतिशत हुन आउने ९० लाख कित्ता सेयर सर्वसाधारणका लागि छुट्याइएको छ ।
कम्पनीले यसअघि पहिलो चरणमा कर्मचारी संचयकोषमा रकम संचित गर्ने संचयकर्ताका लागि १९.५ प्रतिशत अर्थात १ करोड १७ लाख कित्ता, संस्थापक कम्पनीका कर्मचारीका लागि ३.५ प्रतिशत अर्थात २१ लाख कित्ता र ऋणदाता संस्थाका कर्मचारीका लागि १ प्रतिशत अर्थात ६ लाख कित्ता गरी कुल १ करोड ४४ लाख कित्ता सेयर निष्कासन गरी बाँडफाँड गरिसकेको छ ।
कम्पनीको सेयर निष्कासन गरी बाँडफाँड गर्न ग्लोबल आइएमई क्यापिटलाई बिक्री प्रबन्धक तोकिएको छ । चिलिमेको सहायक मध्येभोटेकोसीले सिन्धुपाल्चोकमा १ सय २ मेगावाटको मध्यभोटेकोसी जलविद्युत आयोजना निर्माण गरिरहेको छ ।
.jpg)
