ऊर्जा खबर
काठमाडौँ । ४१.०६ मेगावाटको संखुवा खोला जलविद्युत् आयोजनाको विद्युत् खरिद–बिक्री सम्झौता (पीपीए) भएको छ । नेपाल विद्युत् प्राधिकरण र आयोजना प्रवर्द्धक गुराँस हाइड्रो प्रालिबीच बुधबार (९ माघ २०८० मा) पीपीएमा हस्ताक्षर भएको हो । पीपीएमा प्राधिकरणका कार्यकारी निर्देशक कुलमान घिसिङ र आयोजना प्रवर्द्धक कम्पनीका अध्यक्ष शिवप्रसाद घिमिरेले हस्ताक्षर गरेका छन् ।
आयोजनाको बाँध संरचना (हेडवर्क्स) संखुवासभाको सिलिचिङ गाउँपालिकमा पर्छ भने विद्युत् गृह भोजपुरको साल्पाचिलिचो गाउँपालिकामा पर्छ । यो आयोजनाको अध्ययन विद्युत् विकास विभागले गरेको हो । सरकारी बास्केटमा रहेको यो आयोजना करिब ४ वर्षअघि विभागले गरेको खर्च तिरेर कम्पनीले विकास गर्ने गरी प्रतिस्पर्धाबाट प्राप्त गरेको हो ।
आयोजनाको विद्युत् गृहमा करिब २१ मेगावाट क्षमताका २ वटा विद्युत् उत्पादन युनिट रहने गरी डिजाइन गरिएको छ ।
आयोजनाको विद्युत्को ग्रिड कनेक्सन एग्रिमेन्ट २०७७ सालमै पूरा भइसकेको छ । आयोजनाको बिजुली संखुवासभाको शीतलपाटी सबस्टेशनसम्म २३२ केभी ४ किलोमिटर प्रसारण लाइन बनाएर जोडिने छ । निर्माण सुरु गरेको ४ वर्षमा आयोजना सञ्चालनमा ल्याउने लक्ष्य राखिएको छ । आयोजनामा करिब ६ अर्ब ८८ करोड ३९ लाख रुपैयाँ लगानी हुने अनुमान गरिएको छ ।
