ऊर्जा खबर
काठमाडौं । बागलुङको गलकोट नगरपालिकामा निर्माणाधीन ९.६ मेगावाटको दरम खोला जलविद्युत आयोजनाको काम ६० प्रतिशत पूरा भएको छ । दरम खोला हाइड्रो इनर्जी कम्पनीले निर्माण गरिरहेको आयोजनाको आधाभन्दा बढी काम सकिएको हो ।
आयोजनाको बाँध, पेनस्टक पाइप, विद्युतगृह लगायत सबै क्षेत्रको काम एकसाथ भइरहेको कम्पनीका सञ्चालक हरिप्रसाद सापकोटाले बताए । उनका अनुसार बाँध क्षेत्रको निर्माण अन्तिम चरणमा पुगेको छ ।
अब बाँध क्षेत्रको करिब ५ प्रतिशत काम मात्र बाँकी छ । पाइप आइनपुगेका कारणा ४.२ किलोमिटर लामाे पेनस्टक पाइप लाइनकाे काम भने अहिले राेकिएकाे छ । पेनस्टक पाइप आयाेजना स्थलमा आएपछि जडान गर्न सुरु गरिने उनले बताए ।
विद्युतगृहको पनि अर्थिङ राख्ने तयारी भइरहेको आयोजना प्रमुख शिशिर देवकोटाले बताए । उनका अनुसार विद्युतगृहको पनि काम १५ महिनाभित्र पूरा गरिनेछ । आयोजनाको सबै काम पूरा गरेर अबको डेढ वर्षभित्र विद्युत उत्पादन सुरु गर्ने लक्ष्य रहेको पनि देवकोटाले बताए ।
नेपाल विद्युत प्राधिकरणसँग ७.३ मेगावाटको विद्युत खरिद सम्झौता (पिपिए) गरे पनि पछि क्षमता विस्तार गरिएको कम्पनीले जनाएको छ । कम्पनीले विद्युत विकास विभागबाट २०७३ माघ २३ गते उत्पादन अनुमतिपत्र लिए संरचना निर्माण गर्न सुरु गरेकाे थियाे ।
आयोजनाबाट उत्पादन भएको विद्युत विद्युत प्राधिकरणका हरिचौर सुबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गर्नेछ ।
आयोजना सम्पन्न गर्न २ अर्ब रुपैयाँ लागत अनुमान गरिएको छ । आयोजनामा ७० प्रतिशत ऋण लगानी र ३० प्रतिशत स्वपूजी लगानी छ । आयोजनामा नेपाल इन्फ्रास्ट्रक्चर बैंक लिमिटेड (निफ्रा) अगुवाईमा एनआइसी एसिया बैंकले पनि ऋण लगानी गरेको छ ।
