ऊर्जा खबर
काठमाडौँ । लमजुङ र गोरखाकाे दूधपोखरी र अजिरकोट गाँउपालिका अवस्थित चेपे खोलाको पानी प्रयोग गरी २ मेगावाटको चेपे खोला क्यासकेड जलविद्युत् आयोजना निर्माण गरिने भएको छ । आशुतोष इनर्जी लिमिटेडले आयोजना निर्माण गर्ने भएको छ । कम्पनीका अनुसार आयोजना अघि बढाउन ऊर्जा, जलस्रोत तथा सिँचाइ मन्त्रालयबाट उक्त आयोजनाको प्रारम्भिक वातावरणीय प्रभाव परीक्षण (आईईई) स्वीकृत भइसकेको छ ।
२ मेगावाटको उक्त आयोजनाबाट वार्षिक करिब ११.८०४ गिगावाट घण्टा (१ कराेड १८ लाख ४ हजार युनिट) विद्युत् उत्पादन हुनेछ । कम्पनीका अनुसार आयोजनाका सम्पूर्ण संरचनाहरू चेपे खोलाको दायाँ किनारमा रहने छन् । आयोजनाबाट उत्पादित विद्युत् १.५ किलाेमिटर लामो प्रसारण लाइनमार्फत चेपे खोला साना जलविद्युत आयोजनाको स्वीचयार्ड हुँदै नेपाल विद्युत प्राधिकरणको कीर्तिपुर सवस्टेशनबाट राष्ट्रिय प्रसारण लाइनमा जाेडिने कम्पनीले जनाएकाे छ ।
आयोजनाको बाँधस्थलभन्दा तल तथा विद्युत्गृहभन्दा माथिको खण्डमा पाइने जीवजन्तु, जलचर तथा बोटबिरुवाहरूका लागि आवश्यक पर्ने न्यूनतम पानी सरकारका सम्बन्धित निकायबाट स्वीकृतसहित प्रतिवेदनमा उल्लेख गरेबमोजिम तल्लो तटीय क्षेत्रमा छाेड्न कम्पनीले प्रस्ताव राखेको छ । आयोजनाबाट २०८२ कात्तिकसम्म विद्रयुत् उत्पादन गर्ने लक्ष्य राखिएकाे छ ।
