ऊर्जा खबर
काठमाडौं । अप्पर तामाकोसी हाइड्रो पावर लिमिटेडका सेयरधनीहरूले न्यूनतम २५ प्रतिशतसम्म नगद लाभांस तथा बोनस दिनुपर्ने माग राखेका छन् । कम्पनीको शुक्रबार (भदौ ३ गते) सम्पन्न १४औं साधारणसभाका क्रममा यस्तो माग राखिएको हो ।
साधारण सेयर निष्कासन गरेको ४ वर्ष भइसक्दा पनि कुनै प्रकारको मुनाफा नदिएको भन्दै आक्रोसित सेयरधनीहरूले आर्थिक वर्ष २०७९/८० मा न्यूनतम २५ प्रतिशत लाभांस दिनुपर्ने माग राखेका थिए । कम्पनीले नियमितरूपमा वार्षिक साधारणसभा नगरेकोमा समेत सेयरधनीहरूले आपत्ति जनाएका थिए ।
साधारणसभाका क्रममा कम्पनीका अध्यक्षसमेत रहेका नेपाल विद्युत प्राधिकरणका कार्यकारी निर्देशक कुलमान घिसिङले चालु आवदेखि बोनस तथा लाभांस दिन सकिने भन्दै सेयरधनीहरूलाई आश्वस्त तुल्याए । ‘२०७८ भदौदेखि कम्पनीको ४५६ मेगावाटको माथिल्लो तामाकोसीले व्यापारीक उत्पादन सुरु गरेकोले अब विस्तारै सेयरधनीहरूलाई मुनाफा दिन्छौ’, उनले भने, ‘सेयरधनीहरूलाई बढीभन्दा बढी मुनाफा दिनै हकप्रद सेयर निष्कासन गर्दैछौै ।’
साधारणसभाले सञ्चालक समितिको बैंठकभत्ता, १ः१ अनुपातको हकप्रद सेयर निष्कासन प्रस्ताव समेत पारित गरेको छ । हकप्रद सेयर निष्कासनपश्चात संकलन भएको कम्पनीको पूँजी र माथिल्लो तामाकोसी जलविद्युत केन्द्रबाट भएको आम्दानी अन्य आयोजनामा लगानी गरेर निर्माण सम्पन्न गरि सेयरधनीहरूलाई मुनाफा दिनेतर्फ कम्पनी अग्रसर रहेको घिसिङले जानकारी दिए ।
यस्तै, लेखापरीक्षकले सयममा प्रतिवेदन नबुझाउँदालगायत अन्य कारणले समयमा साधारणसभा गर्न नसिकएको भन्दै घिसिङले अबको साधारणसभा समयमा गरिने प्रतिवद्धता जनाए । कम्पनीको दोलखाको बिगु गाउँपालिकामा रहेको आयोजनाले २०७८ भदौ २५ गतदेखि व्यापारीक उत्पादन सुरु गरेको हो ।
.png)