समयमा काम नगर्ने निर्माण व्यवसायीहरूसँग ठेक्का रद्द गर्दै विद्युत प्राधिकरण

काठमाडौं । नेपाल विद्युत प्राधिकरणले समयमा काम नगर्ने कम्पनीहरूसँग ठेक्का सम्झौता रद्द गर्ने भएको छ । ठेक्का सम्झौता गरेका निर्माणकर्ताले पटक–पटक लिखित तथा मौखिक जानकारी गराउँदा पनि निर्माण कार्य नगरेको र सन्तोषजनक कार्य नभएको भन्दै ठेक्का रद्द गर्न लागेको हो ।

३ आयोजनामा काम गर्ने जनमुखी कन्स्ट्रक्सन बागमती कक्रिंट जेभी र एक आयोजनामा काम गरिरहेको युनियन कन्स्ट्रक्सन प्राइभेट लिमिटेडसँग ठेक्का रद्द गर्न लागिएको प्राधिकरणले जनाएको छ ।

प्राधिकरण तथा सामुदायिक विद्युत प्राधिकरण विभागसँग ठेक्का सम्झौता गरेका यी निर्माणकर्तालाई पटक–पटक ताकेता गर्दा पनि तोकिएको अवधिमा कार्य सम्पन्न नभएको र सम्पर्कमा नआएकाे भन्दै सम्झौता रद्द गर्ने तयारी गरिएको छ । तोकेको अवधिभित्र कार्य पूरा नगरेको र कार्य प्रणाली सन्तोषजनक नदेखेको भन्दै सूचना प्रकाशित गरि ठेक्का रद्द गर्ने तयारी गरेको हो ।

प्राधिकरणले सम्झौता रद्द गर्न नपर्न कुनै मनासिव कारण भएमा सात दिनभित्र निर्माण व्यवसायी तथा आपूर्तिकर्ता स्वयम् उपस्थित भइ स्पष्टीकरण दिन आग्रह गरेको छ ।

यस्तै, गत जेठ २४ गते पनि प्राधिकरण अत्तरिया प्रादेशिक कार्यालयले ९ वटा कम्पनीले निर्माण कार्य नगरेको र सन्तोषजनक कार्य नभएको भन्दै ठेक्का सम्झौता रद्द गर्ने तयारी गरिएकाेले कुनै मानसिव कारण भएमा  स्पष्टीकरण माग गरेकाे थियाे ।