ऊर्जा खबर
काठमाडौं । नेपाल विद्युत प्राधिकरण, मौलापुर वितरण केन्द्रमा कार्यरत सहायक इन्जिनियरमाथि स्थानीयले आक्रमण गरेका छन् । शुक्रबार ( फागुन ५ गते) बिहान करिब १० बजेतिर डाइरेक्ट (हुकिङ) लाइन जडान नगरेकाे भन्दै सहायक इन्जिनियर महेन्द्रप्रसाद चौधरीमाथि भाैतिक आक्रमण गरेका हुन् ।
कार्यलयमा कार्यरत चौधरीलाई २०/३० जनाको समूहले एक्कासी आएर कुटपिट गरेको केन्द्र प्रमुख अरुण शाहले बताए । ‘कार्यलयको परिसरभित्र त्रिभुवन शाह उर्फ अमरलाल साह र धिरज पाण्डेका नेतृत्वमा आएका समूहले चाैधरीलाइ कुटपिट गरेका हुन्,’ उनले ऊर्जा खबरसँग भने, ‘डाइरेक्ट लाइन जडान (हुकिङ) नगरेकाे भन्दै इन्जिनियरमाथि कुटपिट भएको छ ।’
‘कुटपिट तथा गाली गलौच गर्दै उक्त समूहले चार पाङ्ग्रे गाडीमा अपहरण गरी तानाशाही शैलीमा इन्जिनियरलाई लगेर माैलापुर, मदानी महाेत्सवका लागि हुकिङमार्फत लाइन जाेड्न लगाए’ उनले थपे । यस्तो घृणित, असंवैधानिक, अमानविय र अमर्यादित कार्यले सम्पूर्ण कर्मचारी असुरक्षित रहेको भन्दै केन्द्रले आपत्ति जनाएकाे छ ।
केन्द्रले कर्मचारीमाथि भएको यस दुर्वव्यवहारकाे घोर भत्र्सना गर्दै दोषीमाथि कारबाही गर्न आग्रह गरेको छ । कारबाही नभएमा कार्यालका सम्पूर्ण काम ठप्प गरी आन्दोलनमा जाने केन्द्रले चेतावनी दिएकाे छ।
