ऊर्जा खबर
काठमाडौं । म्याग्दीको मालिका गाउँपालिकामा रहेको ५१ किलोवाट क्षमताको रुमखोला लघुजलविद्युत् परियोजना सञ्चालनमा आएको छ । आयोजनाको नहर भासिएपछि विद्युत उत्पादन बन्द भएको आयोजना करिब डेढ महिनापछि सञ्चालनमा आएको हो ।
२०७९ साउन १७ गतेदेखि बन्द भएका विद्युत् उत्पादन पालिकाको सहयोग र उपभोक्ताको श्रमदानमा पुन निर्माण गरी सञ्चालनमा ल्याइएको पालिकाले जनाएको छ ।
गाउँपालिकाले ३१५ एमएम क्षमताको १३८ मिटर पाइप उपलब्ध गराएको थियो । परियोजनासँग रहेको १२ मिटर पाइपलाई दुईलाइनमा जोडेर ७५ मिटर दूरीमा पानी तारिएपछि पुन विद्युत् उत्पादन थालिएको परियोजनाले जनाएको छ ।
जमिन भासिएपछि नहर पुलजस्तै बनेर जुनसुकै बेला भत्किएर थप क्षतिको जोखिम भएकाले त्यसलाई भत्काएर पाइप राखिएको हो । परियोजना बन्द हुँदा उज्यालोका लागि टुकी, सोलारमा भर पर्नुपरेको थियो । पुन उत्पादन सुरु भएपनि करिब ९०० घरधुरी लाभान्वित भएका छन् ।
विसं २०६६ देखि नियमित विद्युत् उत्पादन गर्दै आएको परियोजनाबाट मालिका गाउँपालिकाको दरवाङ, थापाचौर, बतासे, फूलबारी, गरजरा, महभिर, अदिभारा, डाडागाउँ, औल, कोदालिवाङ र खहरेका स्थानीयले विद्युत सेवा लिइरहेका छन् ।
