विद्युत् विकास विभागका महानिर्देशक मण्डलद्वारा आफ्नो आधा तलब सहिद सहयोग कोषमा दिने घोषणा

काठमाडौँ । विद्युत् विकास विभागका महानिर्देशक जीबछ मण्डलले आफूले खाईपाई आएको तबलको आधा सहिद सहयोग कोषमा दिने घोषणा गरेका छन् । देशको विषम परिस्थितिलाई ध्यानमा राखेर निर्वाचनको घोषित मिति फागुन २१ गतेसम्म (६ महिना) आफूले पाउने तलबको आधा उक्त कोषमा दिने निर्णय लिएको ऊर्जा खबरसँग उनले बताए ।

‘देशमा व्याप्त भ्रष्टाचारलाई न्यूनीकरण वा नियन्त्रण होइन कि निर्मूल नै पार्नुपर्छ भनेर मैले आफू सहसचिव हुँदादेखि नै भन्दै आएको थिएँ,’ उनले भने, ‘मन्त्रीज्यूहरूले तलब नलिने घोषणा गरेपछि मलाई पनि अझ प्रेरणा मिलेकोले यो घोषणा गरेको हुँ ।’ यस्तो घोषणा स्वैच्छिक भएकाले अन्य कर्मचारीले पनि आफ्नो अवस्था हेरेर यस्तो घोषणा गर्न सक्ने उनको भनाइ छ ।

‘देशमा भ्रष्टाचारको अन्त्य र सुशासनको माग राख्दै भएको आन्दोलनको मर्म र भावनाअनुसार नै मैले विभागमा भ्रष्टाचारप्रति शून्य सहनशीलता अपनाएर काम गर्न पनि मैले कर्मचारी साथीहरूलाई निर्देशन दिइसकेको छु,’ उनले भने ।

जेन–जी पुस्ताको अगुवाइमा भदौ २३ र २३ गते देशमा भएको आन्दोलन र प्रदर्शनका क्रममा ठूलो जनधनको क्षति भएकोले मृतकका परिवारको सहयोग तथा तोडफोड भएका र जलेका संरचना निर्माणका लागि मितव्ययी भएर अघि बढ्नु पर्ने आवश्यकताका कारण आफूले यस्तो घोषणा गरेको पनि उनको भनाइ छ ।