ऊर्जा खबर
.jpg)
काठमाडौं । सिन्धुपाल्चोकमा निर्माणाधीन ३६ मेगावाटको माथिल्लो बलेफी ‘ए’बा ट विद्युत उत्पादन सुरु गर्न अझै डेढ महिना लाग्ने भएको छ । निर्माण अन्तिम चरणमा पुगेको आयोजनाबाट आगामी पुस दोस्रो सातासम्ममा विद्युत उत्पादन सुरु गर्ने तयारी भइरहेको हो ।
दशैंअघि नै आयोजनाको विद्युत प्रसारण प्रणालीमा जोड्ने योजना अनुसार काम गरिरहेकोमा असारमा सिन्धुपाल्चोकमा आएको बाढी र पहिरोले अवरोध गरेपछि सम्भव नभएको प्रवर्द्धक बलेफी हाइड्रो पावर कम्पनीका सञ्चालक उमेश कसजुले बताए ।
‘असोजभित्रै बत्ती बाल्ने गरी काम अघि बढेको थियो । असार १ गतेको बाढीले आयोजना स्थल पुग्ने सडकमा क्षति गर्यो,’ उनले ऊर्जा खबरसँग भने, ‘यही कारण आयोजनाको निर्माण गतिमा ब्रेक लाग्यो र हामी केही ढिलो भएका छौं ।’ उनले अहिले आयोजनाको विद्युतगृहमा इलेक्ट्रोमेकानिकल उपकरणको जडान तथा आन्तरिक परीक्षण भइरहेको बताए ।
मुख्य सुरुङमा लाइनिङ तथा सरसफाईको काम भइरहेको पनि उनले बताए । आयोजनाको सिभिलतर्फको सबै काम सम्पन्न भइसकेको छ । विद्युतगृहमा उपकरण जडानको काम सम्पन्न गरेपछि संरचनामा पानी भर्न सुरु गरिने कसजुले बताए ।
उनका अनुसार संरचनामा पानी भरेर परीक्षण सुरु गर्न २० देखि २२ दिन लाग्ने बताए । यसअघि आयोजनाबाट २०७८ साल जेठदेखि नै विद्युत उत्पादन गर्ने लक्ष्य थियो । यही समयमा कोरोना (कोभिड–१९) महामारीको दोस्रो लहरको समयमा लगाइएको निशेधाज्ञाका कारण निर्माण सामाग्री तथा उपकरण ढुवानीमा भएको समस्या एवं केही कामदार र कर्मचारी कोरोना संक्रमित भएपछि निर्माण प्रभावित हुँदा तालिका असोजमा सारिएको थियो ।
आयोजनाको विद्युतगृहमा १२ मेगावाटका ३ वटा उत्पादन युनिट रहने छन् । आयोजना सम्पन्न भई उत्पादन हुने विद्युत २२ किलोमिटर टाढाको लामोसाँघु सबस्टेसनमा लगेर जोडिनेछ । विद्युतगृहदेखि सबस्टेसनसम्म आवश्यक प्रसारण लाइन प्रवद्र्धक कम्पनीले निर्माण गरेको छ ।
यो आयोजना सम्पन्न हुँदा ७ अर्ब रुपैयाँ खर्च हुने अनुमान छ । आयोजनामा ३० प्रतिशत ऋण र ७० प्रतिशत स्वपुँजी लगानी छ । आयोजनामा ५ बैंकले ऋण लगानी गरेका छन् ।
