ऊर्जा खबर
काठमाडौँ । सिन्धुपाल्चोकमा निर्माण सम्पन्न ७.२७ मेगावाटको याम्बालिङ खोला जलविद्युत् आयोजनाको विद्युत् राष्ट्रिय प्रसारण प्रणालीमा जोडिएको छ । याम्बालिङ हाइड्रो पावर प्रालिले निर्माण सम्पन्न गरेको आयाजनाको विद्युत् शनिबारदेखि प्रणालीमा जोडिएको हो ।
आयोजनाले उत्पादन गरेको विद्युत् ३३ केभी प्रसारण लाइनमार्फत ७ किलोमिटर दुरीमा रहेको माथिल्लो बलेफी ‘ए’ जलविद्युत् आयोजनाको स्वीचयार्डमा जोडिएको कम्पनीका वित्तीय अधिकृत प्रमिला निरौलाले बताईन् । उनका अनुसार आयोजनाबाट माघ ६ गतेदेखि उत्पादन परिक्षण सुरु भएको हो ।
‘१ महिना जति हाम्रो आयोजनाको उपकरण तथा संरचनाको परीक्षण गर्न लाग्यो,’ उनले ऊर्जा खबरसँग भनिन्, ‘शनिबारबाट आयोजनाले प्रसारण प्रणालीमा विद्युत् दिन सुरु गरेको छ ।’ उनले अहिले आयोजनाबाट परीक्षण उत्पादन भइरहेको र दुई साता नेपाल विद्युत् प्राधिकरणलाई बिजुली निशुल्क दिइएपछि व्यापारिक उत्पादन सुरु गरिने जानकारी दिइन् । प्राधिकरणले माघ २१ गतेसम्म उत्पादन परिक्षण गर्नेछ ।
प्राधिकरणसँगको विद्युत् खरिद सम्झौताअनुसार आयोजनाबाट २०८० मंसिरभित्र विद्युत् उत्पादन गर्ने तालिका थियो । तर, विविध कारणले केही समय ढिला भएको कम्पनीले जानकारी दिएको छ ।
आयोजनाको उत्पादन तालिका लम्बिदा खर्चसँगै बैंकको ब्याज प्रतिशत पनि बढेको कम्पनीले जनाएको छ । आयोजनाको काम १ अर्ब ६९ करोड रुपैयाँ लागतमा सम्पन्न भएको अनुमान छ । सुरुमा आयोजना सम्पन्न गर्न १ अर्ब ५८ करोड रुपैयाँ लागत अनुमान गरिएको थियो ।
आयोजनामा लुम्बिनी बैंकको अगुवाईमा साग्रिला बैंकले ७० प्रतिशत ऋण लगानी गरेका छन् । बाँकी ३० प्रतिशत स्वपूँजी लगानी रहेको छ ।
.jpg)
