डाउन पिलुवाको १०.३ मेगावाट विद्युत प्रणालीमा थपिँदै

काठमाडौं । संखुवासभाको पिलुवा खोलामा निर्माणाधीन १०.३ मेगावाटको डाउन पिलुवा खोला जलविद्युत आयोजनाले आगामी दुई महिनाभित्र उत्पादन परीक्षण सुरु गर्ने भएको छ । रिभर फल्स पावर कम्पनीले निर्माण गरी अन्तिम चरणमा पुर्याएको आयोजनाको विद्युत प्रणालीमा जोडिन लागेको हो ।

आयोजनाकाे काम सकिन लागेकाेले आगामी दुई महिनाभित्र परीक्षण सुरू गर्ने तयारी गरेकाे कम्पनीका अध्यक्ष सुवास आमात्यले बताए । ‘ कात्तिकभित्र उत्पादन परीक्षण सुरू गर्ने तयारी गरिएपनि दशैअघि देखि कामले गति लिन सकेकाे छैन्,’  उनले ऊर्जा खबरसँग भने, ‘ चार्डपर्वकाे माहाेल भएकाेले कामदार छुट्टीमा छन्, अब, तिहार छठ सकिएसँगै कामलाइ तिब्र गतिमा अघि बढाएर २ देखि ३ महिनाभित्र पूरा गरिनेछ ।’

अहिले इलेक्ट्रो मेकानिकल उपकरण जडानको काम भइरहेको छ । उपकरण जडानको काम सकेपछि उत्पादन परीक्षण सुरु हुनेछ ।

आयोजना सम्पन्न भएपछि उत्पादन हुने विद्युत २२० केभी कोसी कोरिडोर प्रसारण लाइनको बानेश्वर सबस्टेसनमा जोडिनेछ । सबस्टेसनसम्मकाे आवश्यक साढे ३ किलोमिटर प्रसारण लाइन कम्पनी आफैले निर्माण गर्नेछ । 

नेपाल विद्युत प्राधिकरणसँग भएको विद्युत खरीद सम्झौता (पिपिए) अनुसार आयोजनाबाट २०७७ चैतदेखि विद्युत उत्पादन गर्नुपर्ने तालिका थियो । तर, विद्युत प्रवाह हुने कोसी कोरिडोर प्रसारण लाइन निर्माणमा भएको ढिलाई, कोरोना माहामारीले गर्दा करिब डेढ वर्ष ढिला गरी विद्युत उत्पादन सुरु गर्न लागिएको कम्पनीले जनाएको छ ।

आयोजना सम्पन्न गर्न १ अर्ब ८९ करोड ४० लाख रुपैयाँ लागत अनुमान गरिएको छ । आयोजनामा सिटिजन बैंकको अगुवाईमा नेपाल इन्भेष्टमेन्ट र प्रभु बैंकले ७० प्रतिशत अर्थात १ अर्ब ३२ करोड रुपैयाँ ऋण लगानी गरेका छन् । बाँकी, ३० प्रतिशत अर्थात ५७ कारोड ४० लाख रुपैयाँ स्वपूँजी छ ।