ऊर्जा खबर
काठमाडौँ । चैनपुर सेती जलविद्युत् कम्पनी लिमिटेडले बझाङको तलकोटमा २१० मेगावाटको चैनपुर सेती जलविद्युत् आयोजना निर्माण गर्ने भएको छ । तलकोटस्थित मष्टा र साइपाल गाँउपालिका रहेको सेती नदीको पानीलाई प्रयोग गर्ने गरी उक्त आंशिक जलाशय आयोजना निर्माण हुने भएको हो ।
कम्पनीले आयोजनाको अध्ययन अनुमतिपत्रका लागि विद्युत् विकास विभागमा आवेदन दिएको छ । ऊर्जा, जलस्रोत तथा सिँचाइ मन्त्रालयबाट उक्त आयोजनाको वातावरणीय प्रभाव मूल्याङ्कन (ईआईए) प्रतिवेदन वन तथा वातावरण मन्त्रालयबाट स्वीकृत भइसकेको छ । आयोजना निर्माण क्रममा कुनै असर पर्ने देखिए सूचना प्रकाशित भएको ३५ दिनभित्र विभाग तथा सम्बन्धित कार्यालयमा लिखित राय–सुझाव पेश गर्न विभागले सोमबार र मंगलबार सूचना जारी गरेको हो ।
आयोजनाका लागि आवश्यक पानी फर्काउन सेती नदीमा ३७ मिटर अग्लो तथा ५२.५ मिटर लामो बाँध निर्माण गरिने छ । ९८ लाख घनमिटर पानी सञ्चय गर्न सक्ने आयोजनाको जलाशयबाट दैनिक अधिकतम ६ घण्टा पूर्ण क्षमतामा विद्युत् उत्पादन हुने गरी पानी भण्डारण गर्न सकिने गरी डिजाइन गरिएको छ ।
आयोजनाबाट वार्षिक सरदर ११५८.०२ गिगावाट घण्टा (१ अर्ब १५ करोड ८० लाख २० हजार) ऊर्जा उत्पादन हुने छ । आयोजनाबाट उत्पादित विद्युत् ०.५ किलोमिटर लामो २२० केभी डबल सर्किट प्रसारण लाइनबाट प्रस्तावित बझाङ हब मार्फत् राष्ट्रिय प्रसारण लाइनमा जोडिने छ ।
आयोजनाबाट २०८७ सालभित्र विद्युत् उत्पादन गर्ने लक्ष्य रहेको छ ।
