ऊर्जा खबर
काठमाडौँ । नेपालगञ्ज वितरण केन्द्रले सडक बत्तीको २७ करोड ८२ हजार ३६५ रूपैयाँ महसुल उठाउन बाँकी रहेका देखिएको छ । २०८१ असार मसान्तसम्म केन्द्रलाई स्थानीय ५ वटा पालिकाले उक्त रकम बराबरको महसुल नबुझाएको केन्द्रको विवरणमा उल्लेख छ ।
ती पालिकाहरूले कुल २१ करोड ५६ लाख २४ हजार ६५४ रूपैयाँ महसुल बक्यौता राखेको र त्यसमा ५ करोड ४४ लाख ५७ हजार ७१० रूपैयाँ जरिवाना लागेपछि बक्यौता रकम बढेको केन्द्रले जनाएको छ ।
बक्यौता नबुझाउने पालिकाहरूमध्ये नेपालगञ्ज उप महानगरपालिकाले जरिवाना सहित सबैभन्दा बढी २० करोड ५९ लाख ५६ हजार ६०४ रूपैयाँ बुझाउन बाँकी छ । त्यस्तै, डुडवा गाँउपालिकाले ४ करोड ३९ लाख ४७ हजार ८९७ रूपैयाँ बुझाउन बाँकी छ ।
त्यस्तै, खजुरा गाँउपालिकाले १ करोड ६ लाख १९ हजार ९९७ रूपैयाँ, जानकी गाँउपालिकाले ७५ लाख ८५ हजार ७८४ रूपैयाँ र नरैनापुर गाँउपालिकाले १९ लाख ७२ हजार ८० रूपैयाँ बक्यौता बुझाउन बाँकी छ ।
बक्यौता नबुझाउने पालिकाहरूको विद्युत् सेवा कटौती गरेर कारवाही गरिने केन्द्रका प्रमुख जगन्नाथ लामिछानेले बताए ।
