ऊर्जा खबर
काठमाडौं । नेपाल धितोपत्र बोर्डले हिमालयन हाइड्रो पावर लिमिटेडलाई साढे २२ लाख कित्ता साधारण सेयर निष्कासन गर्न अनुमति दिएको छ । बोर्डले आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्ने अनुमति दिएको हो ।
सय रूपैयाँ अंकित २२ करोड ५० लाख रुपैयाँ बराबरको २२ लाख ५० हजार कित्ता साधारण सेयर निष्कासन अनुमति पाएको कम्पनीका सचिव कृष्णप्रसाद भण्डारीले बताए । उनका अनुसार बोर्डमा आवेदन दिएकाे करिब साढे २ वर्षमा स्विकृत भएको हो । सेयर निष्कासन अनुमतिका लागि २०७६ कात्तिकमा आवेदन दिइएको थियो ।
पहिलो चरणमा आयोजना प्रभावित स्थानीयका लागि छुट्याएको साधारण सेयर निष्कासन गरी बाँडफाँड गरिनेछ । दोस्रो चरणमा सर्वसाधरणका लागि निष्कासन गरिनेछ ।
सेयर निष्कासन गरी बाँडफाँड गर्न ग्लोबल आइएमई क्यापिटललाई बिक्री प्रबन्धक तोकिएको छ । कम्पनीको कास्कीमा १२ मेगावाटको नामार्जुन मादी सञ्चालनमा छ ।
