ऊर्जा खबर
काठमाडौं । चाइना इनर्जी इन्जिनियरिङ ग्रुप ग्वाङ्छी हाइड्रो इलेक्ट्रिक कन्ट्रक्सन ब्युरो कम्पनीले १ सय ३५ जना कर्मचारी मागेको छ । कम्पनीले सिन्धुपाल्चोकमा निर्माणाधीन १ सय २ मेगावाटको मध्यभोटेकोसी जलविद्युत आयोजनाको काममा खटाउने गरी ठूलो संख्यामा कर्मचारी मागेको हो ।
कम्पनीले मंगलबार सूचना निकालेर रिक्त रहेको आयोजना प्रबन्धकदेखि भान्छेसम्मको पदपूर्ति गर्न आवेदन खुलाएको छ । कम्पनीका अनुसार आयोजनाको काम हेर्ने गरी १ जना आयोजना प्रबन्धक मागिएको छ ।
यस्तै, २ जना सहायक प्रबन्धक र २ जना लेखापाल पनि मागिएको छ । आयोजना प्रबन्धक पदका लागि एमबिए गरेका योग्य व्यक्तिले आवेदन दिन सक्ने कम्पनीले जनाएको छ । सहायक प्रबन्धक र लेखापालका लागि बिबिए÷बिबिएस सरहको शैक्षिक योग्यता तोकिएको छ ।
कम्पनीले १ जना भाषा अनुवादक पनि मागेको छ । अंग्रेजी भाषामा स्नातक उत्र्तिण गरी सम्बन्धि क्षेत्रमा अनुभव हासिल गरेको तथा चिनियाँ भाषाको समेत ज्ञान भएकालाई प्राथमिकता दिइने सूचनामा उल्लेख छ ।
आयोजना स्थलमा खटाउने गरी ५ जना इन्जिनियर मागिएको छ । इन्जिनियरिङ विषयमा स्नातक गरेका योग्य व्यक्तिले यो पदका लागि आवेदन दिन पाउने छन् ।
यस्तै, सबैभन्दा बढी सुरुङसम्बन्धि विज्ञता भएका ३० जना प्राविधिक मागिएको छ । सुरुङको काममा खटाउन प्राविधिक कर्मचारी मागिएको हो । २० जना प्राविधिक, २५ जना सिभिल प्राविधिक र १०/१० जना मेकानिकल तथा इलेक्ट्रिकल प्राविधिकका लागि समेत आवेदन माग भएको कम्पनीले जनाएको छ ।
आयोजना स्थलको भान्छामा खटिने गरी २ जना भान्छे पनि मागिएको छ । यो पदका लागि २ वर्षको अनुभव भएको तथा चिनियाँ र अंग्रेजी भाषाको ज्ञान भएकालाई प्राथमिकता दिइने उल्लेख छ ।
मंगलबारको मितिले सूचना जारी भएको ७ दिनभित्र प्राप्त हुने गरी इच्छुक व्यक्तिले आवेदन दिनुपर्ने कम्पनीले जनाएको छ । योग्य व्यक्तिले आवश्यक सबै कागजात कम्पनीकाे इमेल–[email protected] मा पठाएर इच्छुक पदका लागि आवेदन दिन सक्नेछन् ।
.jpg)
