ऊर्जा खबर
काठमाडौं । तनहुँ हाइड्रो पावर कम्पनीका प्रमुख कार्यकारी अधिकृत (सिइओ) प्रमुख फेरिएका छन् । नेपाल विद्युत प्राधिकरणले भवन तथा भौतिक संरचना निर्माण आयोजनाका निर्देशक किरणकुमार श्रेष्ठलाई कम्पनीको प्रमुख कार्यकारी अधिकृतकाे जिम्मेवारी तोकेको हो ।
कम्पनीको प्रबन्ध सञ्चालक रहेका प्राधिकरणका उपकार्यकारी निर्देशक प्रदीपकुमार थिकेलाई योजना अनुगमन तथा सूचना प्रविधि निर्देशनालयमा सरुवा गरिएको छ । थिके कम्पनीको प्रमुख भएर आएको साढे ४ वर्षपछि फेरि प्राधिकरणमै फर्किएका हुन् ।
‘योजना अनुगमन तथा सूचना प्रविधि निर्देशनालयमा सरुवा भएको चिठ्ठी बुझेको छु,’ उनले ऊर्जा खबरसँग भने, ‘केही काम बाँकी रहेकाले त्यो सम्पन्न गरेर सोमबारदेखि प्राधिकरणमा हाजिर हुन्छु ।’ उनले सरुवा हुनु नियमित प्रक्रिया भएकाले नै आफ्नो पनि सरुवा भएको बताए ।
उनी प्राधिकरणको १२औं तह (उपकार्यकारी निर्देशक) का कर्मचारी हुन् । उनी निर्देशकबाट उपकार्यकारी निर्देशकमा बढुवा भएपछि प्राधिकरणमा फिर्ता बाेलाइएकाे हाे ।
उनको कार्यकालमा कम्पनीले अघि बढाएको १४० मेगावाटको तहनुँ जलाशय जलविद्युत आयोजनाको निर्माण सुरु भएको हो । आयोजनाको करिब ३० प्रतिशत निर्माण पूरा भइसकेको छ ।
प्राधिकरणले आफुलाई कम्पनीमा काजमा खटाएको पत्र दिएको श्रेष्ठले बताए । ‘अहिले काजमा खटाइएको व्यहोराको पत्र बुझेको छु,’ उनले ऊर्जा खबरसँग भने, ‘प्राधिकरणमा गर्न बाँकी रहेको काम पूरा गरेर अर्को सातादेखि तनहुँ हाइड्रोमा हाजिर हुन्छु ।’
प्राधिकरणको भवन तथा भौतिक संरचना निर्माण आयोजना आउनुअघि श्रेष्ठ सान्जेन जलविद्युत कम्पनीको प्रमुख कार्यकारी अधिकृत थिए । उनलाई ४ महिनाअघि मात्रै सान्जेनबाट प्राधिकरणमा फिर्ता बोलाइएको थियो ।
