ऊर्जा खबर
काठमाडौं । म्याग्दीको घारखोलामा निर्माणाधीन १४ मेगावाटको घारखोला जलविद्युत आयोजना ७० प्रतिशत पूरा भएको छ । म्याग्दी हाइड्रोेपावर कम्पनीले निर्माण गरीरहेको आयोजनाको काम अन्तिम चरणमा पुगेको हो ।
आयोजनाको बाँध क्षेत्रको काम ९५ प्रतिशत पुरा भएको कम्पनीका अध्यक्ष भरत नेपालले बताए । उनका अनुसार मुख्य सुरुङको काम पनि अन्तिम चरणमा पुगेको छ ।
‘३ हजार ५ सय मिटर लामो सुरुङको ३ हजार ३ सय ५० मिटर खन्ने काम पुरा भएको छ,’ उनले ऊर्जाखबरसँग भने, ‘बाँकी १ सय ५० मिटर भदौभित्र सकिनेछ ।’ १२ सय मिटर लामो पेनस्टक पाइपलाइनको पनि २ सय मिटर पाइप जडान भइसकेको छ ।
विद्युत गृह निर्माण गर्न पहाड काटेर जग्गा तयार भइसकेको छ । अबको २ हप्ताभित्र विद्युतगृहको जग खन्ने काम सुरु गरिनेछ । घारखोलाको सिभिल ठेकेदार साउथ एशियन इन्फ्रास्ट्रक्चर प्रालि गरिरहेको छ । इलेक्ट्रिकल ठेकेदार सिमर इनर्जी प्रालि र हाइड्रोमेकानिकल ठेकेदार सिई हाइड्रोमेकानिकल वर्क प्रालि रहेका छन् ।
३ वर्षअघिदेखि निर्माण सुरु भएका आयोजनाबाट गत असारमा नै विद्युत उत्पादन गर्ने तालिका थियो, तर, भौगोलिक विकटता, कोरोनाको जोखिम, निषेधाज्ञा र पहिरोको असहज अवस्थाका कारण आयोजना प्रभावित भएको हो ।
अब, आयोजनाबाट २०७९ जेठभित्र विद्युत उत्पादन गर्ने तालिका छ । बाँकी ३० प्रतिशत काम सम्पन्न गरी १० महिनाभित्र विद्युत उत्पादन सुरु गर्ने लक्ष्यका साथ तिव्र गतिमा काम भइरहेको छ ।
आयोजना सम्पन्न गर्न २ अर्ब ४२ करोड रुपैया लागत अनुमान गरिएको छ । आयोजनामा ऐनएमबी बैंकको अगुवाईमा ७० प्रतिशत ऋण लगानी छ । बाँकी ३० प्रतिशत स्वपुँजी लगानी रहेको छ ।
आयोजनाबाट उत्पादीत विद्युत ७ किलोमिटर दुरीमा रहेको नेपाल विद्युत प्राधिकरणको दाना सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गरीरहेको छ ।
