मकर जितुमाया हाइड्रोले ३३ केभी प्रसारण निर्माण गर्दै

काठमाडौं । मकर जितुमाया सुरी हाइड्रो पावर लिमिटेडले ३३ केभी प्रसारण लाइन निर्माण गर्न विद्युत विकास विभागमा आवेदन दिएको छ । कम्पनीले ७ मेगावाटको सुरी खोला जलविद्युत आयोजनको विद्युत प्रवाह हुने ४.३ किलोमिटर लामो प्रसारण लाइन निर्माण गर्न विभागमा आवेदन दिएको हो । 

बागमती प्रदेश अन्तर्गत पर्ने दोलखा जिल्लाको गौरीशंकर गाउँपालिका वडा नम्बर ५ मा निर्माणाधीन सुरी खोला जलविद्युत आयोजनाको स्वीच्यार्डदेखि सोही गाउँपालिकामा सञ्चालनमा रहेको सुरी खोला जलविद्युत आयोजनाको स्वीच्यार्डसम्म ४.३ किलोमिटर लामो ३३ केभी सिंगल सर्किट प्रसारण लाइन निर्माण गर्न लागेको कम्पनीले जनाएको छ । कम्पनीका अनुसार विभागबाट स्वीकृत प्राप्त हुने लगतै प्रसारण लाइन निर्माण गरिनेछ ।

विभागले आयोजना निर्माण तथा सञ्चालन गर्दा पर्न सक्ने प्रतिकुल असरबारे ३५ दिनभित्र लिखित राय सुझाव पेश गर्न आग्रह गरेको छ । 

४.३ किलोमिटर लामो प्रसारण लाइनबाट ७ मेगावाटको विद्युत प्रवाह हुनेछ । उक्त प्रसारण लाइनमा १०२ वटा पोल खडा गरिनेछ । पोलको अधिकतम उचाई १३ मिटर तथा पोलहरुबीचको दुरी ३०–५० मिटर हुनेछ । यस आयोजनाको लागि २.६५०४ हेक्टर जग्गा आवश्यक पर्नेछ । 

लाइनको काम ९ महिनाभित्र सम्पन्न गर्ने लक्ष्य राखेको छ । प्रसारण लाइन निर्माण तथा सञ्चालन गर्दा भू–क्षय, बाढी, वायु, प्रदुषण आदिद्वारा उल्लेखनीय प्रतिकुल असर नपर्ने गरी निर्माण गरिनेछ ।