ऊर्जा खबर
काठमाडौं । ग्लोबल आइएमई बैंक लिमिटेडले ऊर्जा, कृषि, पर्यटनलगायत क्षेत्रमा लगानी गर्न बेलायतको विकास वित्त संस्था सीडीसी ग्रुपबाट ३ अर्ब रुपैयाँ लगानी ल्याउने भएकाे छ ।
निकट भविष्यमा ब्रिटिश इन्टरनेशनल इन्भेष्टमेन्ट हुन लागेको सिडीसी ग्रुपबाट ३ अर्ब (२५ मिलियन अमेरिकी डलर) ऋण लिन सहमतिपत्रमा हस्ताक्षर भएको छ । सम्झौतामा बैंकका प्रमुख कार्यकारी अधिकृत रत्नराज बज्राचार्य तथा सीडीसी ग्रुपका कन्ट्री रिप्रजेन्टेटिभ रवि रायमाझीले बिहीबार हस्ताक्षर गरे ।
सीडीसीबाट प्राप्त ऋणले बैंकको कर्जा प्रवाह क्षमतालाई अभिवृद्धि गर्नुका साथै सरकारको प्राथमिकताका क्षेत्र जलविद्युत, नविकरणीय ऊर्जा र पूर्वाधार, निर्माण, उत्पादन, कृषि र पर्यटन क्षेत्रसम्बन्धी व्यवसायमा ऋण प्रदान गर्न सहयोग पुग्नेछ । साथै, कोभिड महामारीपछिको आर्थिक पुनरुत्थान तथा रोजगारी सृजना गर्दै दिगो र समावेशी विकासमा लगानी बढाउन सहयोग पुग्नेछ ।
नेपाल सीडीसीको प्राथमिकतामा रहेको बताउँदै नेपालभर शाखा पुगेको बैंकसँग सहकार्य गर्न पाएकोमा खुशी भएको सीडीसी ग्रुपका प्रबन्ध निर्देशक तथा एशिया प्रमुख श्रिनि नागाराजनले बताए । उनका अनुसार यस ऋण सहयोगबाट नेपालको आर्थिक पुनरुत्थान र दिगो विकासमा सीडीसीको प्रतिवद्धता रहनेछ ।
विश्व अर्थतन्त्रमा देखिएको मन्दीसँगै अन्तर्राष्ट्रिय पुँजी लगानीमा कमी भइरहेको अवस्थामा बैंकसँगको सहकार्यले नेपालमा लगानीको प्रचुर सम्भावना रहेको सकारात्मक सन्देश प्रवाह हुने र आर्थिक रुपान्तरणमा सहयोग पुग्ने अपेक्षा रहेको पनि नागाराजनले बताए ।
सिडिसीको ऋण सहयोगले बैंकको कर्जा लगानी क्षमता अभिवृद्धि हुने र प्राथमिकताका क्षेत्रमा लगानी बढाउन थप सहयोग पुग्ने बज्राचार्यले बताए । नेपालमा जलवायु परिवर्तनबाट पर्ने असर कम गर्न तथा कोभिड महामारीपछिको आर्थिक पुनरुत्थानमा बेलायत सरकारको सहयोग रहँदै आएको बताउँदै सीडीसीले नेपालको वित्तीय संस्थालाई गरेको यो सहयोग बेलायत सरकारको साना तथा मझौला उद्यमलाई जलवायु परिवर्तनका असर न्यूनीकरणमा गरिएको सहयोगहरु प्राप्त गर्न उनीहरुको संस्थागत क्षमता अभिवृद्धिमा सहयोग पुग्ने बेलायती राजदूत निकोला पोलिटले बताए ।
.jpg)
