ऊर्जा खबर
काठमाडौँ । स्वतन्त्र ऊर्जा उत्पादकहरूको संस्था नेपाल (इपान) ले नेपाल विद्युत् प्राधिकरण र उद्योगीहरूबीचको विवादले ऊर्जा खपत घटाउने परिस्थिति सिर्जना भएको भन्दै चिन्ता व्यक्त गरेको छ । डेडिकेटेड फिडर र ट्रंक लाइनको विद्युत् महसुल विवादका कारण प्राधिकरणले उद्योगको लाइन काटेको र उद्योगीले भने विद्युत् सेवा नै वहिस्कार गर्न सुरु गरेकोले खपत घट्ने र यसले विद्युत् कम्पनीहरुको आम्दानीमा असर गर्ने इपानले जनाएको छ ।
‘वर्षभरि उत्पादन हुने बिजुलीमध्ये ७० प्रतिशतभन्दा बढी बर्षाको समयमा उत्पादन हुने र यही बेला कम खपत भएमा यसले आयोजनाहरुको आर्थिक अवस्थामा प्रत्यक्ष असर पार्छ भने लाइन काट्ने क्रमसँगै खपत कम भई यसको असर आयोजनामा देखिन थालिसकेको छ,’ इपानले सोमबार जारी गरेको विज्ञप्तिमा भनिएको छ, ‘सामान्य अवस्थामा समेत बिजुली खेर गएर निजी क्षेत्रका आयोजनाहरुले समस्या भोगिरहेको बेला भएका उद्योग व्यवसाय समेत बन्द हुने परिस्थितीले आयोजनाहरुको आम्दानीमा गम्भीर असर पर्ने देखिएको छ ।’
देशभित्र विद्युत् खपत बढाउन स्वतन्त्र ऊर्जा उत्पादक, प्राधिकरण र उपभोक्ताबिच सुदृढ हुनुपर्ने भन्दै इपानले विवाद समाधान गर्न ढिलो भएसकेको जनाएको छ ।
‘अहिले दुई पक्षबीच देखिएको संवादहीनता र द्वन्द्वको अवस्था अन्त्यका लागि पहल गरिदिन ऊर्जा, जलस्रोत तथा सिँचाइ मन्त्रालय, उद्योग, वाणिज्य तथा आपूर्ति मन्त्रालय र अन्य सम्वद्ध सरकारी निकायहरुमा पनि इप्पानको तर्फबाट विशेष ध्यानाकर्षण गराउन चाहान्छौँ,’ इपानले भनेको छ ।
