ऊर्जा खबर
काठमाडौँ । भारतलाई ऊर्जा सुरक्षाको प्रत्याभूति दिलाउन भारतीय जनता पार्टी (भाजपा) ले चालु कार्यक्रमलाई अझ बढावा दिने र कैयौँ नयाँ कार्यक्रम ल्याउने घोषणा गरेको छ । १९ अप्रिलदेखि जुन १ सम्म चल्ने गरी सुरु हुन लागेको भारतको संसदीय निर्वाचनलाई लक्षित गर्दै भाजपाले घोषणापत्र मार्फत जनतासमक्ष यस्तो बाचा गरेको हो । पार्टीले आफ्नो घोषणा पत्रमा भारतलाई आवश्यक हरित (स्वच्छ) ऊर्जाको परिपूर्तिका लागि समेत विभिन्न प्रकारका इन्धन उत्पादनका कार्यक्रम अघि बढाइने उल्लेख गरेको छ ।
घोषणा पत्रमा भाजपाले ‘प्रधानमन्त्री उज्यालो योजना (पिएमयुवाई) लाई विस्तार गर्ने तथा ग्यास पाइपलाइनको पहुँचमा रहेका १ करोड १ लाख परिवारबाहेक अन्य धेरै परिवारलाई समेत यसको पहुँचमा ल्याउने बाचा गरेको छ ।
ग्रामीण इलाका तथा बञ्चित परिवारलाई खाना पकाउने स्वच्छ इन्धन उपलब्ध गराउने उद्देश्यले सरकारले सन् २०१६ मा उज्यालो योजना सुरु गरेको थियो । खास गरी दाउरा, कोइला, गुइँठा जस्ता ऊर्जा स्रोतको प्रयोग गरी खाना पकाउने परिवारको भान्सामा स्वच्छ ग्यास उपलब्ध गराउने उद्देश्य यो योजनाले राखेको थियो ।
सन् २०२३ सेप्टेम्बरमा भाजपाकै सरकारले पिएमयुवाई योजनाको अवधि २०२६ सम्मका लागि बढाइदिएको थियो । त्यसताका यस योजनाअन्तर्गत थप ७५ लाख परिवारलाई खाना पकाउने स्वच्छ ग्यासको पहुँचमा ल्याई कुल १० करोड ३५ लाख परिवारको
भान्सामा स्वच्छ ग्यास पुर्याउने लक्ष्य राखिएको थियो । आर्थिक वर्ष २०२२–२३ सम्ममा सरकारले यो योजनाअन्तर्गत ९ करोड परिवारलाई खाना पकाउने ग्यासको पहुँचमा पुर्याएको थियो ।
त्यस्तै सरकारले ‘सिटी ग्यास आपूर्ति’ कार्यक्रमलाई देशव्यापी रूपमा विस्तार गरिरहेको छ । यस कार्यक्रममार्फत् सन् २०३० सम्ममा ऊर्जा बास्केट (ऊर्जा मिश्रण) प्राकृतिक ग्यासको हिस्सेदारीलाई मौजुदा ६.८ प्रतिशतबाट बढाएर १५ प्रतिशत बनाउने लक्ष्य राखिएको छ ।
भारतको ऊर्जा बास्केटमा नवीकरणीय ऊर्जाको हिस्सेदारी बढाउने प्रधानमन्त्री नरेन्द्र मोदीको सरकारले विशेष ध्यान दिइरहेको छ । घोषणा पत्रमा संयुक्त राष्ट्र संघ जलवायु परिवर्तन नियन्त्रण प्रतिवद्धताका अनुसार भारतले आफ्नो ऊर्जा योजना विस्तार गर्दै यसअन्तर्गत ५०० गिगावाट नवीकरणीय ऊर्जा उत्पादनको लक्ष्य राखिएको छ । बाचापत्रमार्फत साना मोडुलर रिएक्टरहरू (एसएमआर) का सहायताले न्युक्लियर ऊर्जाको विस्तार गर्ने समेत प्रतिबद्धता भाजपाले गरेको छ ।
भाजपाले फेरि तेस्रो पटक नेरेन्द्र मोदीलाई प्रधानमन्त्रीको उमेद्वार बनाउने तयारी गरेको छ । ‘फिर एक बार, मोदी सरकार’ भन्ने नारासहित भाजपा चुनाव प्रचार प्रसारमा उत्रिएको छ । ‘मोदी की गारंटी’ शीर्षकमा आइतबार भाजपाले संकल्प पत्र जारी गरेको हो । (भारतीय समाचार संस्थाहरूको सहयोगमा)
