कोप–२९ अजरबैजान र कोप–३० ब्राजिलमा हुने

काठमाडौं । विश्व जलवायु सम्मेलन कोप–२९ अजरबैजान र कोप–३० ब्राजिलमा हुने भएको छ । संयुक्त अरब इमिरेट्सको दुबईमा सम्पन्न कोप–२८ सम्मेलनले यस्तो निर्णय गरेको हो ।

अजरबैजानमा २०२४ नोभेम्बर ११–२२ सम्म र ब्राजिलममा २०२५ नोभेम्बर १०–२१ सम्म गर्ने निर्णय गरेको छ । कोप–२९ मा सरकारले जलवायु चुनौतीको मात्रा र जरुरीता झल्काउँदै नयाँ जलवायु वित्त लक्ष्य स्थापना गर्नुपर्नेछ । कोप–३० मा नयाँ राष्ट्रिय रूपमा निर्धारित योगदानका साथ तयार हुनुपर्नेछ ।

जीवाश्म इन्धनको युग ‘अन्त्यको’ सुरुवात गर्ने सहमति गर्दै कोप–२८ बुधबार (मंसिर २७ गते) सम्पन्न भएको छ । उत्सर्जन कटौती गरी न्यायपूर्ण विश्व निर्माणको आधार तयार गर्ने सहमति सम्मेलनबाट जुटेको हो ।

कोप–२८ सम्मेलन संयुक्त अरब इमिरेट्सको दुबईमा भएको थियो । सम्मेलनका दुई सय पक्ष राष्ट्रका वार्ताकारले विश्वव्यापी तापमान वृद्धिलाई १.५ डिग्री सेल्सियसमा सीमित राख्न जलवायु कार्यलाई तीव्र पार्ने उद्देश्यमा सहमति जनाएका छन् ।