१३२ केभीको २९ किलोमिटर लामो प्रसारण लाइन निर्माण गर्दै ठूलो खोला–ए 

काठमाडौँ । माथिल्लो ठूलो खोला–ए जलविद्युत् आयोजनाको विद्युत् प्रसारणका लागि १३२ केभी विद्युत् प्रसारण लाइन निर्माण गरिने भएको छ । यसका लागि अनुमति माग्दै प्रवर्द्धक ठूलो खोला हाइड्रोपावर कम्पनीले विद्युत् विकास विभागमा आवेदन दिएको छ । कम्पनीले म्याग्दीको रघुगंगा पालिका–७ मा निर्माणाधीन माथिल्लो ठूलो खोला–ए जलविद्युत् आयोजनाको स्विचयार्डदेखि सोही जिल्लाको अन्नपूर्ण गाउँपालिका–३ मा रहेको नेपाल विद्युत् प्राधिकरणलको २२०/१३२/३३ केभी दाना सवस्टेसनसम्म प्रसारण लाइन निर्माण गरिने छ । 

प्रवद्र्धक कम्पनीका अनुसार २९.५४९ किलोमिटर लामो विद्युत् प्रसारण लाइनमा ९१ वटा टावरहरू रहने छन् । टावरको उचाई अधिकतम ३४.६९ मिटर तथा टावरबीचमा ८७ देखि ९०० मिटरसम्म रहने बताएको छ । १ लाख ३२ हजार भोल्ट क्षमताको आयो लाइन सिङ्गल सर्किटको हुनेछ भने यसबाट २२.५ मेगावाट सम्मको विद्युत् शक्ति प्रसारण गर्न सकिने कम्पनीले जनाएको छ । 

आयोजना २४ महिनाभित्र निर्माण सम्पन्न गर्ने लक्ष्य राखिएको छ । उक्त प्रसारण लाइन निर्माण गर्दा वातावरणमा उल्लेखनीय प्रतिकुल असर पर्ने देखिए ३५ दिनभित्र विभाग वा प्रवर्द्धक कम्पनीमा लिखित राय तथा प्रतिक्रिया दिन विभागले सूचना जारी गरेको छ ।