भण्डारीले माथिल्लो तामाकोसीको गाडी फिर्ता गरे

दाेलखा । पूर्वऊर्जा, जलस्रोत तथा सिँचाइ मन्त्री शरतसिंह भण्डारीले माथिल्लो तामाकोसी जलविद्युत आयाेजनाको गाडी फिर्ता गरेका छन् । ३ दिनका लागि भनेर लगेको गाडी फिर्ता नगरेपछि ऊर्जा खबरले यसबारे मंगलबार (असार २९ गते) समाचार प्रकाशित गरेको थियो । समाचार प्रकाशित भएको २४ घन्टा नबित्दै गाडी फिर्ता भएको छ ।

सर्वोच्च अदालतले पदमुक्त गरेका पूर्वमन्त्री भण्डारीले तामाकोसीको बा११च २५८७ नम्बरको टोयटा फर्चुन गाडी ३ दिनका लागि भन्दै लगेका थिए । तर, ३ साता बित्दासमेत फिर्ता नआएको आयोजनाले गुनासो गरेको थियो ।

आयाेजनाले आज (असार ३० गते) मन्त्री भण्डारीकाे भैंसेपाटीस्थित निवासमा पुगेर गाडी फिर्ता ल्याएकाे जानकारी दिएकाे छ । उक्त गाडी आयाेजनाका प्रवक्ता गणेशप्रसाद न्याैपानेले चढ्दै आएका थिए ।

याे पनि पढ्नुहाेस् : सत्ता छाेडे पनि कब्जा गर्ने पुरानाे शैली फेरिएन, भण्डारीले तामाकाेसीकाे गाडी फिर्ता गरेनन्

२ साता मन्त्री बनेका भण्डारी पदमुक्त भएकै दिन दिउँसो आयोजनाको गाडी लिएर हिँडेका थिए । आयोजना स्रोतका अनुसार मन्त्रीले गाडी चाहियो भनेपछि नेपाल विद्युत प्राधिकरणले अपर तामाकोसी हाइड्रो पावर कम्पनीसँग गाडी मागेको थियो ।

मन्त्रीले चढ्ने गाडी मगाएको भन्दै सोही दिन ऊर्जा, जलस्रोत तथा सिँचाई मन्त्रालयका कर्मचारी र मन्त्रीका सहयोगी नम्बर प्लेट परिवर्तन गर्न भनी यातायात कार्यालय एकान्तकुना पुगेका थिए । तर, यातायात कार्यालयले तत्काल नम्बर प्लेट परिवर्तन गर्न नमिल्ने भनेर फर्काएको समेत एक कर्मचारीले जानकारी दिए ।

नम्बर प्लेट परिवर्तन नहुने भएपछि तत्कालीन मन्त्रीका सहयोगीले ३ दिनमा गाडी फिर्ता गरिदिने प्रतिबद्धता जनाएका थिए । गाडी लिएर गएको २ घन्टामै सर्वोच्च अदालतको आदेशपछि अन्य मन्त्रीसँगै भण्डारी पनि पदमुक्त भएका थिए । पदमुक्त भएका मन्त्रीले गाडी पनि आफूसँगै लिएर गएको र अहिलेसम्म फर्काउने छाँटकाट नदेखिएको आयोजना स्रोतले बतायो ।

मन्त्रीले लगेको गाडी आयोजनाले १० वर्ष अघि खरिद गरेको थियो । आयोजनासँग २२ वटा गाडी छन् । बेला बेलामा विभिन्न सचिव, विभागीय अधिकारीहरूको निर्देशनमा आयोजनाले १/२ दिन गाडी पठाउने गरेको भए पनि यसरी लामो समय लिएर गएको भने पहिलो पटक हो ।

नेकपा माओवादी छोडेर नेकपा एमाले प्रवेश गरेका टाेपबहादुर रायमाझीको सांसद पद गुमेपछि गत जेठ २१ गते तत्कालीन प्रधानमन्त्री केपी शर्मा ओलीले परिषद् पुर्नगठन गरी भण्डारीलाई ऊर्जा जलस्रोत तथा सिँचाइ मन्त्रीमा नियुक्त गरेका थिए ।

ओलीले राजेन्द्र महत्ताेकाे नेतृत्वमा ८ मन्त्री र २ राज्यमन्त्री नियुक्त गरी मन्त्रीपरिषद पुनर्गठन गरेका थिए । नेपाली काँग्रेस पार्टीबाट राजनिति जीवनको सुरुवात गरेका भण्डारी मधेसी जनाधिकार फोरम हुँदै अहिले जनता समाजवादी पार्टीको नेता बनेका हुन् । उनले विगतमा पनि पटक–पटक विभिन्न मन्त्रालयको जिम्मेवारी सम्हालेका थिए ।