ऊर्जा खबर
काठमाडौं । म्याग्दी हाइड्रो पावर कम्पनीले निर्माण गरिरहेको १४ मेगावाटको घार खोला जलविद्युत आयोजनाको काम ९७ प्रतिशत सकिएको छ । कम्पनीले म्याग्दी जिल्लाको घारखोलामा २०७५ साल देखि निर्माण सुरु गरेको उक्त आयोजनाको काम अन्तिम चरणमा पुगेको हो ।
निर्माणाधीन आयोजनाको सिभिल संचनाको काम ९९ प्रतिशत सकिएको आयोजना प्रमुख विनोद देवकोटाले बताए । ‘आयोजनको बाँध र टनेलको सिभिल संरचनाको काम सकिएको छ’ उनले ऊर्जा खबरसँग भने, ‘अहिले सुरुङको अन्तिम चरणको काम भईरहेको छ, बाँकी काम १० दिनभित्र सकिनेछ ।’
विद्युतगृहको सिभिल संरचनाको काम पुरा गरी मुख्य उपकरण जडानको काम भइरहेको कम्पनीले जनाएको छ । प्रसारण लाइनको काम पनि अन्तिम चरणमा पुगेको छ । आगामी चैतभित्रमा उत्पादन परीक्षण सुरु गर्ने लक्ष्यका साथ धमाधम कामहरू अघि बढीरहेको छ ।
आयोजनाको सबै काम पुरा गरेर चैतभित्र उत्पादन परीक्षण सुरु गर्ने लक्ष्य रहेको देबकोटाले बताए ।आयोजनाबाट उत्पादन हुने विद्युत ३३ केभी प्रसारणा लाइनमार्फत ८ किलोमिटर दुरीमा रहेको नेपाल विद्युत प्राधिकरणको दाना सबस्टेनमा जोडिनेछ । सबस्टेसनमा सिभिलको काम सकिएर उपकरण जडानको काम भइरहेकोे छ ।
४ वर्ष अघिदेखि निर्माण सुरु भएको आयोजनाबाट यसअघि नै विद्युत उत्पादन सुरु गर्ने तालिका थियो । तर, भौगोलिक विकटता, कोरोनाको जोखिम, युक्रेन र रसियाको युद्धले इलोक्ट्रोमेकानिकल उपकरण आयातमा प्रभावलगायत विविध कारणले तालिका सरेको देवकोटाले बताए । पछिल्लो तालिका अनुसार आयोजनाबाट २०७९ चैतभित्र विद्युत उत्पादन गर्नुपर्नेछ ।
आयोजना सम्पन्न गर्न २ अर्ब ४२ करोड रुपैया लागत अनुमान गरिएको छ । आयोजनामा ७० प्रतिशत ऋण लगानी छ । बाँकी ३० प्रतिशत स्वपुँजी लगानी रहेको छ ।
आयोजनको थप विवरण
जिल्ला : म्याग्दी
क्षमता : १४ मेगावाट
निर्माण सुरु भएको मिति : २०७५ साल
पाइपालाइन : १२०० मिटर
सुरुङ : ३५०० मिटर
उत्पादन लक्ष्य : २०७९ चैतभित्र
विद्युत जोडिने विन्दु : दाना सबस्टेसन
प्रसारण लाइन : ३३ केभी, ८ किलोमिटर
अनुमानित लागत : २ अर्ब ४२ करोड
