माथिल्लो कालंगागाड ९३ प्रतिशत सकियो, पुसदेखि विद्युत उत्पादन 

काठमाडौं । सुदुरपश्चिम प्रदेशको बझाङस्थित कालंगा बेसीनमा निर्माणाधीन ३८.४६ मेगावाटको माथिल्लो कालंगागाड जलविद्युत आयोजनाको काम ९३ प्रतिशत पूरा भएको छ । सानिगाड हाइड्रो कम्पनीले निर्माण गरिरहेको आयोजनाको काम अन्तिम चरणमा पुगेको हो ।

आयोजनाको बाँध र सुरुङ खन्ने काम पूरा भएको  प्रवद्र्धक पुष्प चित्रकारले बताए । उनका अनुसार आयोजनाको ७ हजार ८ सय ५ मिटर लामो सुरुङ ढलान गर्ने काम भइरहेको छ । आयोजनाको १ हजार १ सय ५० मिटर पेनस्टक पाइप राख्ने काम भइरहेको छ ।

विद्युतगृहमा कन्डक्टर र स्युचयार्डको काम भइरहको छ । आयोजनाको सबै काम पूरा गरेर आगामी पुसदेखि विद्युत उत्पादन सुरु गर्ने लक्ष्य रहेको पनि चित्रकारले बताए ।

आयोजनाबाट भदौदेखि विद्युत उत्पादन सुरु गर्ने तालिका थियो,’ उनले ऊर्जाखबरसँग भने, ‘तर, विश्वव्यापी रुपमा फैलिएको कोभिड र वर्षा लाग्नासाथ आएको अविरल बर्षापछिको बाढीपहिरोले क्षति पुर्याउँदा उत्पादन तालिका सरेको हो ।’

आयोजनास्थल पुग्ने सडक ठाउँ–ठाउँमा बाढीले बगाउँदा पूर्णरूपमा अवरुद्ध हुँदा ढुवानीका गाडी आयोजना स्थल पुर्याउन सकिएको थिएन । अहिले बगाएको तथा भत्किएको स्थानको सडक स्तरोन्नति गरी सामान ढुवानीको काम पनि भइरहेको छ ।

बाढीले आयोजनाको बाँध र विद्युतगृहमा पनि सामान्य क्षति गरेको थियो । बाँधमा पहिरो खसेर थुनिएपछिको बाढी बालुवा थिग्राउने पोखरीको एउटा प्यानल बगाएको चित्रकारले जानकारी दिए ।

पहिलो तालिका अनुसार आयोजनाबाट २०७७ असारदेखि उत्पादन सुरु गर्ने तालिका भए पनि भौगोलिक विकटता तथा कमजोर भौगोलिक अवस्थाका कारण सुरुङमा देखिएको समस्याले सम्भव नभएको कम्पनीले जनाएको छ । दोस्रो तालिका अनुसार आयोजनाबाट भदौमा उत्पादन सुरु गर्ने भएपनि बाढीपहिराले गर्दा प्रभावित भएको छ । अब, आयोजनामा केही समस्या आएनभने आगामी पुसदेखि उत्पादन सुरु गरिने कम्पनीले जनाएको छ ।

आयोजनाले उत्पादन गर्ने विद्युत दार्चुलास्थित १३२/३३ केभी बलाँच सबस्टेसनमा जोडिनेछ । आयोजना पूरा गर्न ६ अर्ब ९४ करोड रुपैयाँ लागत अनुमान गरिएको छ । आयोजनामा माछापुच्छ्रे बैंकको अगुवाइमा ८ बैंकले ऋण लगानी गरेका छन् ।

कालंगा बेसिनमा माथिल्लो कालंगागाडसहित १५.३३ मेगावाटको कालंगागाड र १०.७ मेगावाटको सानीगाड आयोजना निर्माणाधीन छन् । ३ वटै आयोजना एउटै समूहले निर्माण गरिरहेको हो ।