ऊर्जा खबर
.jpg)
काठमाडौँ । ऊर्जा, जलस्रोत तथा सिँचाइ मन्त्री विराजभक्त श्रेष्ठले ४ सल्लाहकार समूह गठन गरेका छन् । मन्त्री श्रेष्ठले बिहीबार ३ जना नयाँ सल्लाहकार नियुक्त गरी ४ पुर्याएका हुन् ।
मन्त्रालयका अनुसार आशुतोष तिवारी योजना तथा लगानी, रमेश पौडेल नीति र गणेश कार्की निजी क्षेत्र हेर्ने गरी नियुक्त गरेका छन् । यसअघि विवेकराज कँडेल ऊर्जा सल्लाहकारका रूपमा नियुक्त भइसकेका थिए ।
नयाँ नियुक्तिसँगै मन्त्री श्रेष्ठको सल्लाहकार समूहमा ऊर्जा, नीति, योजना तथा लगानी र निजी क्षेत्रका विषय विज्ञका रूपमा ४ जना समेटिएको उनको सचिवालयले जनाएको छ । कार्की स्वतन्त्र ऊर्जा उत्पादकहरूको संस्था नेपाल (इपान) का निवर्तमान अध्यक्ष हुन् ।
मन्त्रीका सल्लाहकारहरूले सम्बन्धित क्षेत्रका नीति निर्माण, योजना तर्जुमा, लगानी प्रवर्द्धन तथा निजी क्षेत्रसँगको समन्वयलगायतका विषयमा आवश्यक सुझाव र परामर्श दिने बताइएको छ । सबै सल्लाहकारले अवैतनिक रूपमा जिम्मेवारी निर्वाह गर्ने मन्त्रालयले जनाएको छ ।
