ऊर्जा खबर
काठमाडौं । ऊर्जा, जलस्रोत तथा सिँचाइ मन्त्रालयले विद्युत् नियमन आयोगको रिक्त रहेका पदाधिकारीको नियुक्तिका लागि सिफारिस समिति गठन गरेको छ । मन्त्री विराजभक्त श्रेष्ठले मन्त्रीस्तरीय निर्णयमार्फत मन्त्रालयका सचिव चिरञ्जीवी चटौतको संयोजकत्वमा तीन सदस्यीय समिति गठन गरेका हुन् ।
समितिका सदस्यहरूमा ऊर्जा मन्त्रालयका सहसचिव सागरराज गौतम र ऊर्जा विज्ञ सतिषनारायण जोशी रहेका छन् । नवनियुक्त समितिले आयोगको अध्यक्षसहित ४ जना सदस्यका लागि १५ दिनको म्याद राखेर सार्वजनिक सूचना आह्वान गर्ने तयारी गरेको छ । यसअघिका अध्यक्ष डा. रामप्रसाद धितालसहितका पदाधिकारीहरू सरकारले जारी गरेको नयाँ अध्यादेशका कारण स्वतः पदमुक्त भएपछि आयोगमा नेतृत्व खाली भएको थियो ।
विद्युत् नियमन आयोग ऐनको व्यवस्था अनुसार समितिले आवेदन परेका उम्मेदवारको मूल्यांकन गरी दरखास्त दिने अन्तिम मिति सकिएको २१ दिनभित्र उपयुक्त पात्रहरूको नाम मन्त्रालयलाई सिफारिस गर्नुपर्ने छ । संयोजक चटौतका अनुसार समितिले ऐनमा उल्लेखित समयसीमा र प्रक्रियाभित्रै रहेर पारदर्शी ढंगले पदाधिकारी चयनको कार्य सम्पन्न गर्ने छ । आयोगमा नेतृत्व खाली हुँदा विद्युत् क्षेत्रका विभिन्न नियमनकारी कार्यमा असर पर्न थालिसकेको छ ।
