अपि पावरको नबिकेको १३ लाख ४६ हजार कित्ता सेयर लिलामीमा ल्याइने

काठमाडौं । अपि पावर कम्पनीले नबिकेको हकप्रद सेयर लिलामीबाट बिक्री गर्ने भएको छ । कम्पनीले आगामी पुस ६ गतेबाट कम्पनीको सेयर लिलामीमा ल्याउन लागेको हो ।सर्वसाधारणका लागि जारी भई आवेदन नपरेको १३ लाख ४६ हजार २ सय १८ कित्ता सेयर लिलामीबाट बिक्री गरिने कम्पनीले जनाएको छ ।

कम्पनीका अनुसार सेयर लिलामी प्रक्रियाबाट खरिद गर्न लगानीकर्ताले पुस १३ गतेसम्म आवेदन दिइसक्नु पर्नेछ । कम्पनीको सेयर खरिद गर्न इच्छुक व्यक्ति, कम्पनी वा संस्थाले तोकिएको प्रतिकित्ता  १ सय रुपैयाँ वा सो भन्दा बढी मूल्य तिर्ने गरी न्युनतम १ सय कित्तादेखि बढीमा सबै कित्ताका लागि आवेदन दिन पाउने भएका छन् । आवेदन दिन इच्छुक व्यक्ति, कम्पनी र संस्थाले बिक्री प्रबन्धक सिद्धार्थ क्यापिटलको कार्यालयमा पुगेर आवेदन दिन सक्नेछन् ।

सिद्धार्थ बैंकको शाखा कार्यालयहरूबाट पनि आवेदन दिन सकिने कम्पनीले जनाएको छ । कम्पनीले गत कात्तिक १४ देखि मंसिर मंसिर ४ गतेसम्म ५६ लाख ७० हजार कित्ता हकप्रद सेयर निस्कासन गरेको छ । कम्पनीले दार्चुलामा साढे १६ मेगावाटका २ जलविद्युत आयोजना निर्माण गरेकाे छ । दुवै आयोजना सञ्चालनमा छन् ।