ऊर्जा खबर
काठमाडौँ । राधी विद्युत् कम्पनी लिमिटेडले आफ्ना सेयरधनीलाई ५ प्रतिशत मुनाफा वितरण गर्ने भएको छ । कम्पनीको बुधबार बसेको सञ्चालक समितिको बैठकले आर्थिक वर्ष २०८०/८१ को मुनाफाबाट चुक्ता पुँजीकाे ४.७५ प्रतिशत बोनस शेयरका रूपमा र ०.२५ प्रतिशत नगद लाभांशका रूपमा वितरण गर्ने गरेको कम्पनीले जनाएको छ ।
यस अनुसार कम्पनीले चुक्ता पुँजी १ अर्ब ७५ करोड ५५ लाख ७८ हजार ८ सय ४६ रुपैयाँको ४.७५ प्रतिशतले हुने ८ करोड ३३ लाख ९० हजार ४ सय ७० रुपैयाँ बराबरका ८ लाख ३३ हजार ९ सय ४ कित्ता बोनस सेयर वितरण गर्ने छ ।
त्यस्तै, कम्पनीले चुक्ता पूँजीको ६९.८९ प्रतिशतले हुन आउने १०० रुपैयाँ अङ्कित दरका कुल १ करोड २८ लाख ५२ हजार ६२६ कित्ता हकप्रदेश सेयर पनि जारी गर्ने भएको छ । यसअनुसार कम्पनीमा कायम प्रत्येक सेयरधनीले १ कित्ता बराबर ०.६९८९ कित्ता हकप्रद सेयर खरिद गर्न आवेदन दिन सक्ने छन् ।
कम्पनीका अनुसार पुस १८ गते बस्ने साधारणसभामा बोनस सेयर वितरणको विशेष प्रस्तावउपर छलफल हुने छ । त्यस्तै, नगद लाभांश वितरण गर्ने साधारण प्रस्ताव पनि प्रस्तुत हुने छ ।
त्यस्तै साधारणसभामा कम्पनीले गत आर्थिक वर्षको वार्षिक प्रतिवेदनमाथि छलफल गर्ने, गत आर्थिक वर्षकै वासलात, नाफा–नोक्सान हिसाब तथा सोही अवधिको नगद प्रवाह विवरण छलफल गरी पारित गर्ने र चालु आर्थिक वर्षका लागि लेखा परीक्षक नियुक्त गर्ने र पारिश्रमिक निर्धारण गर्ने जनाएको छ ।
साधारणसभाका लागि पुस ४ गते एक दिनका लागि कम्पनीको शेयर दर्ता पुस्तिका तथा शेयर दाखिला खारेजीको कार्य बन्द रहने कम्पनीले जनाएको छ । पुस ३ गतेसम्म कारोबार भई त्यसको ७ कार्यदिनभित्र दाखिल खारेज भई कायम रहेका शेयरधनी मात्र सम्मेलनमा भाग लिनका लागि योग्य हुनेछन् ।
कम्पनी ऐन अनुसार २०६२ सालमा स्थापना भएको यो कम्पनीले लमजुङमा ४.४ मेगावाटको राधी साना जलविद्युत् केन्द्र सञ्चालन गरिरहेको छ । त्यस्तै, कम्पनीले युनिभर्सल पावर कम्पनी लिमिटेड, दोर्दी खोला जलविद्युत् लिमिटेड, कासुवा खोला जविद्युत् लिमिटेड र राप्ती हाइड्रो एन्ड जेनरल कन्स्ट्रक्सन लिमिटेडमा समेत लगानी गरेको छ ।
